ମୁମ୍ବାଇ,୨୪।୮: ମହାରାଷ୍ଟ୍ର ରାଜ୍ୟ ଭିଓ୍ବାଣ୍ଡିର ଶାନ୍ତିନଗରରେ ଶୁକ୍ରବାର ବିଳମ୍ବିତ ରାତିରେ ଏକ ୪ ମହଲା ବିଶିଷ୍ଟ କୋଠାଘର ଭୁଶୁଡ଼ିପଡ଼ିଛି। ଏହି ଦୁଃଖଦ ଘଟଣାରେ ୨ ଜଣଙ୍କର ମୃତ୍ୟୁ ହୋଇଥିବା ବେଳେ ୫ଜଣ ଗୁରୁତର ଆହତ ହୋଇଛନ୍ତି। ଆହତମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଆଉ କିଛି ଲୋକ ଭଗ୍ନାବଶେଷ ତଳେ ଚାପି ହୋଇଯାଇଥିବା ସନ୍ଦେହ କରାଯାଉଛି। ଏହି ଘଟଣାରେ ମୃତକଙ୍କ ସଂଖ୍ୟା ବୃଦ୍ଧି ପାଇବା ନେଇ ଆଶଙ୍କା କରାଯାଉଛି। ଘଟଣାସ୍ଥଳରେ ଏବେ ବି ପୋଲିସ ଓ ଏନ୍ଡିଆରଏଫ୍ ଟିମ୍ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଭିୱାଣ୍ଡିଠାରେ ଥିବା କୋଠାଘର ପୂର୍ବରୁ ଜରାଜୀର୍ଣ୍ଣ ଅବସ୍ଥାରେ ଥିବା ବେଳେ ଏହା ଭୁଶୁଡ଼ିପଡ଼ିବା ଆଶଙ୍କାରେ ସେଠାରେ ଲୋକମାନଙ୍କୁ ଖାଲି କରାଯାଇଥିଲା। ହେଲେ ଘଟଣା ଘଟିବା ଦିନ ସେଠାରୁ ଲୋକଙ୍କୁ ଖାଲି କରାଯାଉଥିବା ସମୟରେ କିଛି ଲୋକ ବିନାନୁମତିରେ ନିଜ ଜିନିଷ ଆଣିବା ପାଇଁ ଘର ଭିତରକୁ ଚାଲି ଯାଇଥିଲେ। ଏହାପରେ କୋଠାଟି ଭୁଶୁଡି ପଡ଼ିଥିଲା ବୋଲି ଭିୱାଣ୍ଡି-ନିଜାମପୁର ନଗରପାଳିକା କମିଶନର ଅଶୋକ ରଣଖମ୍ବ କହିଛନ୍ତି।