ମୁମ୍ବାଇ, ୩।୬: ମୁମ୍ବାଇ ମୁହାଁ ହେବା ପୂର୍ବରୁ ସାମୁଦ୍ରିକ ଝଡ଼ ନିସର୍ଗ ଦୁର୍ବଳ ହୋଇଯାଇଛି। ଏହା ଦକ୍ଷିଣ ଦିଗରେ ଆଗକୁ ଗତି କରିଛି। ଫଳରେ ମୁମ୍ବାଇ ଉପରେ ଥିବା ବିପଦ ଟଳି ଯାଇଛି। ପବନର ବେଗ ଘଣ୍ଟାପ୍ରତି ୫୦ କିଲୋମିଟର ଥିବାବେଳେ ବର୍ଷା ଜାରି ରହିଛି। ତେଣୁ କ୍ଷୟକ୍ଷତିର ଆଶଙ୍କା ହ୍ରାସ ପାଇଥିବା ପାଣିପାଗ ବିଭାଗ ପକ୍ଷରୁ କୁହାଯାଇଛି। ଉଦ୍ଧାର କାର୍ଯ୍ୟ ପାଇଁ ମହାରାଷ୍ଟ୍ରରେ ୨୦ ଏନ୍ଡିଆର୍ଏଫ୍ ଦଳଙ୍କୁ ମୁତୟନ କରାଯାଇଛି। ସେଥିମଧ୍ୟରୁ ୮ଟି ଦଳ ମୁମ୍ବାଇରେ କାର୍ଯ୍ୟ କରୁଥିବାବେଳେ ରାୟଗଡ଼ରେ ୫ ଏବଂ ପାଲଘରରେ ୨ଟି ଦଳ ରହିଛନ୍ତି। ଲୋକଙ୍କୁ ଘରୁ ନ ବାହାରିବାକୁ ପ୍ରଶାସନ ପକ୍ଷରୁ ସତର୍କ ସୂଚନା ଜାରି କରାଯାଇଛି।