ମୁମ୍ବାଇ, ୨୮ା୩ (ପି.ଟି.): କୋଭିଡ୍-୧୯ ଲକ୍ଡାଉନ୍ ଯୋଗୁ ମୁମ୍ବାଇର ବିଭିନ୍ନ ଖେଳପଡ଼ିଆରେ କାର୍ଯ୍ୟରତ ଗ୍ରାଉଣ୍ଡ୍ସମ୍ୟାନମାନେ କଠିନ ପରିସ୍ଥିତି ଦେଇ ଗତି କରୁଛନ୍ତି। ସେମାନଙ୍କୁ ସହାୟତା ପାଇଁ ୮ଟି ମୁମ୍ବାଇ ପ୍ରିମିୟର ଲିଗ୍ (ଏମ୍ପିଏଲ୍) ଦଳର ମାଲିକ ପ୍ରତ୍ୟେକ ୧ଲକ୍ଷ ଟଙ୍କା ଲେଖାଏଁ ଦାନ କରିଛନ୍ତି। କୋଭିଡ୍-୧୯ ଦେଖା ଦେବାପରେ ମୁମ୍ବାଇରେ କ୍ରୀଡ଼ା କାର୍ଯ୍ୟକଳାପ ବନ୍ଦ ରହିଛି। ଏପରିକି ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ) ଏପ୍ରିଲ ୧୫ ପର୍ଯ୍ୟନ୍ତ ସେମାନଙ୍କର ସମସ୍ତ କାର୍ଯ୍ୟକଳାପ ସ୍ଥଗିତ ରଖିଛନ୍ତି। କୋଭିଡ୍-୧୯ ଲକ୍ଡାଉନ୍ ଯୋଗୁ ବିଭିନ୍ନ କ୍ଲବର ପଡ଼ିଆଗୁଡ଼ିକରେ ଦିନ ମଜୁରିଆ ଭାବେ କାର୍ଯ୍ୟ କରୁଥିବା ଗ୍ରାଉଣ୍ଡ୍ସମ୍ୟାନମାନେ ରେଜଗାର ପନ୍ଥା ହରାଇଛନ୍ତି। ତେଣୁ ସେମାନଙ୍କୁ ଆର୍ଥିକ ସହାୟତାର ଆବଶ୍ୟକତା ରହିଛି ବୋଲି ଏମ୍ପିଏଲ୍ ଟିମ୍ଗୁଡ଼ିକର ମାଲିକମାନେ ଏମ୍ସିଏ ମୁଖ୍ୟ ବିଜୟ ପାଟିଲଙ୍କ ନିକଟକୁ ପଠାଇଥିବା ଏକ ଚିଠିରେ ଉଲ୍ଲେଖ କରିଛନ୍ତି।
