ବିନିକା, ୯ା୬(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବିନିକା ବ୍ଲକ ସିଂଘିଯୁବା ପଁଚେତ୍ ଅଧୀନ ଜାମପାଲି ତଲିପଡ଼ାର ଦେବକୀ କଲିତା(୩୪)। ଆପ୍ନେ ହାଡ଼ୁ କଲିତା(୪୨) ଆର ତିନ୍ ପିଲାକୁ ନେଇ ତାକର ପରିବାର ହସ୍ଖୁସିଥି ଚାଲିଥିଲା। ୨୦୧୭ ଜୁନ୍ ୧୨ ତାରିଖରେ ଦେବକୀକଁର ପେଟ୍ ଚିଅଁାବାର ଆରମ୍ ହେଲା। ହାଡ଼ୁ ଦେବକୀକେ ନେଇ ବୁର୍ଲା ଡାକ୍ତରଖାନାରେ ଚିକିସତ୍ା କରାଲେ। ଡାକ୍ତର ଦେବକୀକଁର ପେଟଭିତରେ ଗୁଟେ ଆବୁ ବଢ଼ୁଛେ, ଅପରେଶନ କରବାକେ ପଡ଼ବା ବଲି ପରାମଶ୍ ଦେଇଥିଲେ। ଏନ୍ତାଥି ଭୂମିହୀନ ହାଡ଼ୁ ଚିନ୍ତାରେ ପଡ଼ିଗଲେ। କୁଲିମଜୁରି କରି କୁଟୁମ ପୁଷ୍ବେ କି ମାଏକିନାର ଅପରେଶନ ଲାଗି ଟଁକା ଯୁଗାଡ଼ କରବେ। ଶେଷେ ସାହୁକାରନେ କାମ କରବାର ଲାଗି ଆଗତୁରା ବଏନା ଆନି ସେ ଟଁକାରେ ଦେବକୀର ଅପରେଶନ କରାଲେ। ଫେନ୍ଥରେ ପରିବାରର ହସ୍ଖୁସି ଫିରିଆଏଲା ସତ୍, ହେଲେ ଖୁସିଟା ବେଶିଦିନ ନାଇଁ ଠହରିଲା। ଦିନାକେତେ ଉତାରୁ ଫେନ୍ ଦେବକୀକଁର ପେଟ୍ଚିଅଁା ଆରମ୍ ହେଲା। ହାଡୁ ଫେନ୍ଥରେ ମାଏକିନାକେ ଧରି ଚିକିସତ୍ା ଲାଗି ବୁର୍ଲା ଗଲେ। ସେଠାନେ ପରୀକ୍ଷା ନିରୀକ୍ଷା ଉତାରୁ ଦେବକୀର ପେଟେ ପାଏନ୍ ଜମା ହେଇଥିବାର ଡାକ୍ତର କହିଥିଲେ। ଯେତେ ଜଲ୍ଦି ହେବା ପେଟୁ ପାଏନ୍ ବାହାର କରବାକେ ପଡ଼ବା ବଲି ଡାକ୍ତର ପରାମଶ୍ ଦେଇଥିଲେ। ଇ କଥା ଶୁନି ହାଡ଼ୁର ମୁଡେ ଅକାଲ ଚଡ଼କ ପଡ଼ିଥିଲା। ସାହୁକାରନୁ ଆନିଥିବାର ବଏନା ଟଁକା ଅସୁଝା ଥିଲାବେଲେ ଫେନ୍ ଘାଏ ଅପରେଶନ କଥା ଶୁନି ହାଡ଼ୁ ଚିନ୍ତାରେ ଭାଂଗି ପଡ଼୍ଲେ। ଉପେ ଶୂଇନ୍ ହେଇ ହାଡ଼ୁ ଘରର ଜିନିଷପାତି ବିକାଭଂଗା କରି ସେ ଟଁକାରେ ଦେବକୀର ପେଟୁ ପାଏନ୍ କଢ଼ାଗଲା। ହେଲେ ଥିତିରେ କେହେନ୍ସି ପରକାର ପରିବରତନ୍ ନାଇଁ ହେଲା। ଫେନ୍ଘାଏ ସବୁପରକାର ପରୀକ୍ଷା ନିରୀକ୍ଷା କଲାରୁ ଜନାଗଲା ଯେ ଦେବକୀ କର୍କଟ ରୋଗ୍ରେ ପୀଡ଼ିତ ଅଛନ୍। ଇଆଡ଼େ ହାଡ଼ୁ ମାଏକିନାର ଚିକିସତ୍ାରେ ସରବ୍ସୁଅଁାତ ହେଇଯାଇଛନ୍। ଏନ୍ତାଥି ଦେବକୀର ଚିକିସତ୍ା କରାବାର ହାଡୁର ପକ୍ଷେ ଅସମ୍ଭବ ହେଇଯାଇଛେ। ଏହେଦେ ଦେବକୀ ବୁର୍ଲା ମେଡିକାଲରେ ମୁରତୁ ସଂଗେ ଯୁଝୁଛନ୍। ବଡ଼ଝିଅ ବର୍ଷା(୧୫), ମଝିଅଁା ଝି ଲିଜା ଆର ପୁଓ ରାକେଶ ମା’ର ଚିକିସତ୍ା ଲାଗି ଗଣମାଧ୍ୟମ ଜରିଆରେ ସରକାରୀ, ବେସରକାରୀ ସାହାଯ୍ ଲାଗି ଗୁହାରି କରିଛନ୍। ଇ ଦୁଖି ଦରିଦିରିଆ ପରିବାରକେ ଯେତେ ଜଲ୍ଦି ହେବା ସରକାର ଚିକିସତ୍ା ସାହାଯ୍ ଯୁଗେଇ ଦେବାକେ ଜାମପାଲି ଗଁାବାସୀ ବି ନିବେଦନ କରିଛନ୍।