ନୂଆଦିଲ୍ଲୀ,୫।୧: ଭାରତୀୟ ଜନତା ପାର୍ଟି(ଭାଜପା)ର ବରିଷ୍ଠ ନେତା ମୁରଲୀ ମନୋହର ଯୋଶୀଙ୍କ ୮୬ ତମ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ଶୁଭେଚ୍ଛା ଜଣାଇବା ସହ ତାଙ୍କର ସୁସ୍ଥ ଓ ଦୀର୍ଘ ଜୀବନ କାମନା କରିଛନ୍ତି। ଟୁଇଟ୍ କରି ମୋଦି ଲେଖିଛନ୍ତି ଭାଜପାର ଜଣେ ଟାଣୁଆ ନେତା ଭାବେ ଯୋଶୀଙ୍କର ଦେଶପ୍ରତି ବହୁ ଅବଦନ ରହିଛି। ତାଙ୍କର ଦୀର୍ଘଦିନର ରାଜନୈତିକ କ୍ୟାରିୟର ମଧ୍ୟରେ ସେ ଦେଶର ଉନ୍ନତି ପାଇଁ ବହୁ କାର୍ଯ୍ୟ କରିଥିବା ମୋଦି ଟୁଇଟ୍ କରିଛନ୍ତି। ତାଙ୍କ ସହ କାମ କରିବାର ସୌଭାଗ୍ୟ ମିଳିଥିବାରୁ ମୋଦି ନିଜକୁ ଧନ୍ୟ ମନେ କରିଛନ୍ତି। ଦଳର କର୍ମୀମାନେ ସେମାନଙ୍କଠାରୁ ବହୁକଥା ଶିକ୍ଷା କରିଛନ୍ତି। କିପରି ଦଳକୁ ମଜଭୂତ କରିବା ତାହା କେବଳ ଯୋଶୀଙ୍କଠାରୁ ଶିକ୍ଷା ମିଳିଛି ବୋଲି ମୋଦି କହିଛନ୍ତି। ଏହାପରେ ମୋଦି ତାଙ୍କ ବସଭବନକୁ ଯାଇ ଶୁଭେଚ୍ଛା ଜଣାଇଛନ୍ତି। ସୂଚନାଯୋଗ୍ୟ, ଯୋଶୀ ୧୯୩୪ ମସିହା ଜାନୁୟାରୀ ୫ରେ ନୈନିତାଲ ବା ବର୍ତ୍ତମାନର ଉତ୍ତରାଖଣ୍ଡରେ ଜନ୍ମ ନେଇଥିଲେ।