ଭୁବନେଶ୍ୱର,୨୦ା୭(ବ୍ୟୁରୋ): କେଉଁ ବଣ ଜଙ୍ଗଲ ଅଞ୍ଚଳ ନୁହେଁ,ଖୋଦ ରାଜଧାନୀରେ ଆଦିବାସୀ ନାବାଳିକାଙ୍କୁ ବଳାତ୍କାର କରାଯାଉଛି। ବାଡ ଯଦି ଫସଲ ଖାଇବ ତେବେ କଥା ସରିଲା। ସରକାରଙ୍କ ଆଦିବାସୀ ଉନ୍ନୟନ ବିଭାଗ ଦ୍ୱାରା ପରିଚାଳିତ ଛାତ୍ରୀ ନିବାସରେ ଛାତ୍ରୀମାନେ ସୁରକ୍ଷିତ ନାହାନ୍ତି। ସ୍କୁଲ ଶିକ୍ଷକ ଓ ଚତୁର୍ଥ ଶ୍ରେଣୀ କର୍ମଚାରୀଙ୍କ ଦ୍ୱାରା ଗର୍ଭବତୀ ହେଉଛନ୍ତି। ରାଜ୍ୟ ସରକାର ୫ ବର୍ଷରେ ୨୦ଜଣ ଝିଅ ଗର୍ଭବତୀ ହୋଇଥିବା ସୂଚନା ଦେଉଛନ୍ତି। ମାତ୍ର ବହୁ ଘଟଣା ଲୋକଲୋଚନକୁ ଆସି ପାରୁନାହିଁ। ଆଦିବାସୀମାନଙ୍କ ପାଇଁ ଆସୁଥିବା ଅର୍ଥ ବିକାଶ କ୍ଷେତ୍ରରେ ଲାଗୁନାହିଁ। ସରକାରଙ୍କ ଜନଜାତିଙ୍କ ପ୍ରତି ଉଦସୀନ ମନୋଭାବ ପୋଷଣ କରୁଛନ୍ତି ବୋଲି ଶୁକ୍ରବାର ମୁଲତବୀ ଆଲୋଚନା ବେଳେ ଭାଜପା ଓ କଂଗ୍ରେସ ସଦସ୍ୟମାନେ ସରକାରଙ୍କୁ କଡା ସମାଲୋଚନା କରିଥିଲେ।
ରାଜ୍ୟରେ ଅନୁସୂଚୀତ ଜନଜାତି ବିଭାଗ ଦ୍ୱାରା ପ୍ରତିଷ୍ଠିତ ଛାତ୍ରୀ ନିବାସରେ ଅବ୍ୟବସ୍ଥା ଓ ଅସଦାଚରଣ ଶୀର୍ଷକ ମୁଲତବୀ ପ୍ରସ୍ତାବ ଆଗତ କରି ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝି କହିଛନ୍ତି ଯେ ସ୍କୁଲରେ ଛାତ୍ରୀଙ୍କୁ ପ୍ରଧାନଶିକ୍ଷକ ବଳାତ୍କାର କରି ଗିରଫ ହୋଇଛନ୍ତି। ଏ ନେଇ ଓଡିଶା ପୋଷ୍ଟରେ ଖବର ପ୍ରକାଶ ପାଇଛି। ସରକାର କହୁଛନ୍ତି ସ୍କୁଲରେ ଛାତ୍ରୀମାନେ ଗର୍ଭବତୀ ହେଉ ନାହାନ୍ତି, ଗାଁରେ ହେଉଛନ୍ତି। ଏହି ଘଟଣାରେ ସରକାର କଣ କହିବେ ବୋଲି ସେ ପ୍ରଶ୍ନ କରିଥିଲେ। କେନ୍ଦୁଝର ଜିଲାରେ ଜଣେ ଚତୁର୍ଥ ଶ୍ରେଣୀ କର୍ମଚାରୀ ଗିରଫ କରାଯାଇଥିଲା। ସରକାର ଆଦିବାସୀ ବିଭାଗକୁ ଗୁରୁତ୍ୱ ଦେଉ ନାହାନ୍ତି ବୋଲି ସେ ଅଭିଯୋଗ କରିଥିଲେ। ଭାଜପା ସଦସ୍ୟ ମୁକେଶ ମହାଲିଙ୍ଗ, ସନାତନ ବିଜୁଳି , କଂଗ୍ରେସ ସଭ୍ୟ ତାରା ପ୍ରସାଦ ବାହିନିପତି ପ୍ରମୁଖ ସ୍କୁଲରେ ଆଦିବାସୀ ଛାତ୍ରୀ ବଳାତ୍କାରକୁ ନେଇ ଉଦ୍ବେଗ ପ୍ରକାଶ କରିଥିଲେ। ଛାତ୍ରୀ ନିବାସ ପରିବେଶକୁ ନେଇ ସେମାନେ ଅସନ୍ତୋଷ ବ୍ୟକ୍ତ କରିଥିଲେ। ଛାତ୍ରୀ ନିବାସଗୁଡିକରେ ମହିଳା ଶିକ୍ଷକ ଓ କର୍ମଚାରୀ ନିଯୁକ୍ତ କରିବାକୁ ଦାବି କରିଥିଲେ। ଦୃଷ୍ଟି ଆକର୍ଷଣ ପ୍ରସ୍ତାବ ଆଣି ଶାସକ ଦଳ ସଦସ୍ୟ ପ୍ରମୋଦ ମଲ୍ଲିକ, ଭାଗିରଥୀ ସେଠୀ, ଶ୍ରୀକାନ୍ତ ସାହୁ, ରଘୁରାମ ପଡାଲ ଆଦିବାସୀ ଛାତ୍ରୀଛାତ୍ରଙ୍କ ଶିକ୍ଷା ଓ ବିକାଶ ପାଇଁ ସରକାର ନେଇଥିବା ପଦକ୍ଷେପ ସମ୍ପର୍କରେ ସୂଚନା ଦେଇଥିଲେ। ଏଥିସହିତ ଛାତ୍ରୀମାନଙ୍କର ସୁରକ୍ଷା ପାଇଁ ସରକାର ବଦ୍ଧପରିକର ବୋଲି କହିଥିଲେ। ମୁଲତବୀ ପ୍ରସ୍ତାବ ଆଲୋଚନାର ଜବାବରେ ଅନୁସୂଚୀତ ଜାତି, ଜନଜାତି ଓ ପଛୁୂଆ ବର୍ଗ କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା କହିଛନ୍ତି ଯେ ଏସ୍ସି, ଏସ୍ଟିଙ୍କ ସାମୁହିକ ବିକାଶ ପାଇଁ ଶିକ୍ଷା ମୁଖ୍ୟ ମାଧ୍ୟମ। ଓଡିଶା ଏକମାତ୍ର ରାଜ୍ୟ ଯେଉଁଠି ୬ ଲକ୍ଷ ଅନୁସୂଚୀତ ଜାତି ଓ ଜନଜାତି ଛାତ୍ରୀଛାତ୍ରଙ୍କୁ ୬୫୦୦ ହଷ୍ଟେଲରେ ରଖାଯାଇ ଆବାସିକ ବିଦ୍ୟାଳୟରେ ଶିକ୍ଷାଦାନ କରାଯାଉଛି। ସେମାନଙ୍କ ମଧ୍ୟରୁ ପ୍ରାୟ ୩.୩୦ ଲକ୍ଷ ହେଉଛନ୍ତି ଛାତ୍ରୀ। ଛାତ୍ରୀଛାତ୍ରଙ୍କ ସୁରକ୍ଷା, ନିରାପତ୍ତା ଓ ସ୍ବାସ୍ଥ୍ୟ ପ୍ରତି ସରକାର ସଚେତନ ଥିବାରୁ ଏହାକୁ ଗୁରୁତ୍ୱ ଦେଇ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁର(ଏସଓପି) ଅନୁସରଣ କରିବାକୁ ପ୍ରାଧନ ଶିକ୍ଷକ ଓ ମଙ୍ଗଳଅଧିକାରୀଙ୍କୁ ଅବଗତ କରାଯାଇଛି। ୩୦୦ ମାଟ୍ରନ ଛାତ୍ରୀ ନିବାସରେ ନିୟୋଜିତ କରାଯାଇଛି। ଏଏନ୍ଏମ୍ଙ୍କ ସହ ଯୋଗାଯୋଗ କରି ଛାତ୍ରୀମାନଙ୍କୁ ମାଟ୍ରନମାନେ ସ୍ବାସ୍ଥ୍ୟ ସେବା ଯୋଗାଇବାରେ ସହାୟକ ହେଉଛନ୍ତି। ରାଜ୍ୟ ସରକାର ୩୩୮ ଏଏନ୍ଏମ୍ ପଦବୀ ସୃଷ୍ଟି କରି ପ୍ରତି ୫/୬ଟି ସ୍କୁଲ ହଷ୍ଟେଲ ପାଇଁ ଜେଣ ଲେଖାଏ ଏଏନ୍ଏମ୍ଙ୍କୁ ନିୟୋଜିତ କରାଯାଇଛି। ଛାତ୍ରୀମାନଙ୍କ ଅଭିଯୋଗ ଶୁଣାଣି ପାଇଁ ରାଜ୍ୟ ସ୍ତରରେ ଏକ ସ୍ବତନ୍ତ୍ର ସ୍କୁଲ ହଷ୍ଟେଲ ମନିଟରିଂ ୟୁନିଟ ରହିଛି। ଭୁବନେଶ୍ୱର ପ୍ରଦର୍ଶନୀ ପଡିଆଠାରେ ଏକ କଣ୍ଟ୍ରୋଲ ରୁମ ଖୋଲା ଯାଇଛି। ଆବାସିକ ବିଦ୍ୟାଳୟ ପରିସର ଉପରେ ନଜର ରଖିବାକୁ ୧୧୨୦ଟି ସିସିଟିଭି କ୍ୟାମେରା ଲଗାଯାଇଛି ବୋଲି ମନ୍ତ୍ରୀ ଗୃହକୁ ଅବଗତ କରାଇଛନ୍ତି।