ନୂଆଦିଲ୍ଲୀ, ୮ା୫ (ପି.ଟି.)-ଅଷ୍ଟ୍ରେଲିଆର ପୂର୍ବତନ ବିସ୍ଫୋରକ ଓପନିଂ ବ୍ୟାଟ୍ସମ୍ୟାନ ମାଥ୍ୟୁ ହେଡେନ୍ ଏକଦା ମୋ ମୁହଁକୁ ମୁଷ୍ଟି ପ୍ରହାର କରିବା ଲାଗି ଧମକ ଦେଇଥିଲେ ବୋଲି କହିଛନ୍ତି ଭାରତର ଆଉଟ୍ ଅଫ୍ ଫେଭର ଉଇକେଟକିପର ପାର୍ଥିବ ପଟେଲ। ବର୍ତ୍ତମାନ କିନ୍ତୁ ଆମେ ଦୁଇଜଣ ଭଲ ବନ୍ଧୁ ବୋଲି ଏକ ସାକ୍ଷାତ୍କାର ବେଳେ ସେ କହିଛନ୍ତି। ଘଟଣାଟି ଘଟିଥିଲା ୨୦୦୪ରେ ଏକ ଅନ୍ତର୍ଜାତୀୟ ଦିନିକିଆ ସିରିଜ ବେଳେ। ବ୍ରିସ୍ବେନ୍ ମ୍ୟାଚ ଚାଲିଥିବାବେଳେ ମୁଁ ଡ୍ରିଙ୍କ୍ସ ନେଇ ପଡ଼ିଆକୁ ଯାଇଥିଲି। ସେତେବେଳେ ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତରେ ଇର୍ଫାନ ପଠାନ ହେଡେନଙ୍କୁ ଆଉଟ କରିଦେଇଥାନ୍ତି। ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ସେତେବେଳେ ଶତକ ହାସଲ କରି ସାରିଥାନ୍ତା। ମୁଁ ତାଙ୍କ ପାଖ ଦେଇ ଯାଉଥିବାବେଳେ ଆକ୍ଷେପ କରି ‘ହୁ ହୁ’ କରିଥିଲି। ଏଥିରେ ସେ ଖୁବ୍ ରାଗି ଯାଇଥିଲେ। ବ୍ରିସ୍ବେନ ଡ୍ରେସିଂ ରୁମ୍ ଯାହାକି ଏକ ଟନେଲ ସଦୃଶ। ସେଠାରେ ସେ ଦୃଢ ଭାବେ ଛିଡ଼ା ହୋଇ ମୋ ଅପେକ୍ଷାରେ ଥିଲେ। ମୋତେ କହିଥିଲେ ତୁମେ ଯଦି ପୁଣି ଏଭଳି ଆକ୍ଷେପ କରିବ ତେବେ ତୁମ ମୁହଁକୁ ମୁଷ୍ଟିରେ ପ୍ରହାର କରିବି। ମୁଁ ତାଙ୍କୁ ‘ସରି’ କହିବା ପରେ ସେ ଚାଲିଯାଇଥିଲେ ବୋଲି ପଟେଲ କହିଛନ୍ତି। ଏହି ଘଟଣାର ୪ବର୍ଷ ପରେ ଦୁଇ କ୍ରିକେଟର ଚେନ୍ନାଇ ସୁପର କିଙ୍ଗ୍ସ ଦଳରେ ସାଥୀ ହୋଇ ଖେଳିଥିଲେ। ଦୁହିଁଙ୍କ ମଧ୍ୟରେ କ୍ରମେ ସୁସମ୍ପର୍କ ସ୍ଥାପିତ ହୋଇଥିଲା। ପଟେଲ କହିଛନ୍ତି, ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ପରେ ହେଡେନ ଥରେ ଅଷ୍ଟ୍ରେଲିଆରେ ତାଙ୍କ ବାସଭବନକୁ ଡିନର ପାଇଁ ନିମନ୍ତ୍ରଣ କରିଥିଲେ। ଯେଉଁ ହେଡେନ ବ୍ରିସ୍ବେନ୍ରେ ମୋତେ ମାଡ଼ ମାରିବା ଲାଗି କହୁଥିଲେ ସେ ମୋର ବନ୍ଧୁ ପାଲଟିଯାଇଥିଲେ। ସିଏସ୍କେ ଦଳରେ ଆମେ ଏକତ୍ର ଅନେକ ମ୍ୟାଚ ଖେଳିଛୁ। ଖେଳକୁ ମିଳିତ ଭାବେ ଉପଭୋଗ କରିଛୁ। ଆଇପିଏଲ୍ ଶେଷ ହେବା ପରେ ଏକ ଇମର୍ଜିଂ ଦଳ ସହିତ ମୁଁ ଅଷ୍ଟ୍ରେଲିଆ ଟୁର୍ରେ ଯାଇଥିଲି। ସେତେବେଳେ ହେଡେନ ମୋତେ ତାଙ୍କ ଘରକୁ ଡକାଇଥିଲେ। ମୋ ପାଇଁ ସେ ଚିକେନ ବରିୟାନୀ ଓ ଡାଲି ପ୍ରସ୍ତୁତ କରିଥିଲେ ବୋଲି ପଟେଲ କହିଛନ୍ତି।