ନୂଆପଡା ଅଫିସ,୯ା୮ -ସ୍ଥାନୀୟ ମୁସରଙ୍ଗି ସଂରକ୍ଷିତ ଜଙ୍ଗଲରେ ୨ ଛୁଆ ସମେତ ୪ କଲରାପତରିଆ ବାଘ ରହିଥିବା ଜଣାପଡ଼ିବା ପରେ ସେହି ଅଞ୍ଚଳରେ ଆତଙ୍କ ଖେଳିଯାଇଛି । ଦିନତମାମ ଜଙ୍ଗଲରେ ଥିବା ପାହାଡ଼ ଶିଖରରେ ବାଘ ହାକୁଟି ମାରୁଥିବାବେଳେ ରାତିରେ ଜଙ୍ଗଲ ତଳି ଅଞ୍ଚଳରେ ପଇଁତରା ମାରୁଥିବାରୁ ଏହା ଲୋକଙ୍କୁ ଭୟଭୀତ କରିଛି । ଖବର ପାଇ ନୂଆପଡା ରେଞ୍ଜର ଅସିତ କୁମାର ଦାସଙ୍କ ନେତୃତ୍ୱରେ ଏକ ଟିମ ଗୁରୁବାର ଜଙ୍ଗଲ ବୁଲି ଦେଖିଥିଲେ ା ବାଇନାକୁଲାରରେ ଦୁଇଟି ବାଘ ଶୋଇଥିବାର ଦୃଶ୍ୟ ଦେଖିବାକୁ ମିଳିଥିଲା । ଲୋକେ ମଧ୍ୟ ସେହି ବାଘକୁ ଜଣ ଜଣ କରି ଦେଖିଥିଲେ। ନିର୍ଭୟରେ ବାଘମାନେ ଶୋଇ ରହିଥିଲେ। ଏହା ପରେ ଅଧିକାରୀମାନେ ସ୍ଥାନୀୟ ଗାଁ ଗୁଡିକୁ ବୁଲି ଲୋକଙ୍କୁ ସତର୍କ କରିଥିଲେ । ସନ୍ଧ୍ୟା ହେଲେ ଘରୁ ନ ବାହାରିବା, ଚାଷ ଜମିକୁ ନ ଯିବା, ସ୍କୁଲ ପିଲାଙ୍କୁ ବାହାରକୁ ନ ଛାଡିବାକୁ କୁହାଯାଇଛି । ଏହା ଉପରେ ରେଞ୍ଜର ଦାସ କହିଛନ୍ତି, ଜଙ୍ଗଲ ତଳେ ଏକ ଫରେଷ୍ଟ ଟିମ ୨୪ ଘଣ୍ଟା ଜଗି ରହିଛି । ବାଘମାନଙ୍କ ଗତିବିଧିକୁ ଅନୁଧ୍ୟାନ କରୁଛି। ଯଦି ଏମାନେ ହିଂସ୍ର ହୁଅନ୍ତି ତେବେ ଟ୍ରାନକ୍ୟୁଲାଇଜର ଲଗାଇ ବାଘମାନଙ୍କୁ ଘଉଡାଇବା ବ୍ୟବସ୍ଥା କରାଯିବ । ଆବଶ୍ୟକ ହେଲେ ଧରିବାକୁ ବ୍ୟବସ୍ଥା କରିବୁ ବୋଲି ସେ କହିଛନ୍ତି ।
ସୂଚନା ଅନୁସାରେ ସୁନାବେଡା ଅଭୟାରଣ୍ୟକୁ ଲାଗି ରହିଛି ମୋଟା ନୂଆପଡା ଗ୍ରାମପଞ୍ଚାୟତର ମୁସରଙ୍ଗି ସଂରକ୍ଷିତ ଜଙ୍ଗଲ। ଏହି ଜଙ୍ଗଲ ଅଞ୍ଚଳରେ ଗତ ଶନିବାର ଜଣେ ଚାଷୀଙ୍କ ବାଛୁରୀ ଓ ଗାଈକୁ ବାଘ ମାରି ଖାଇଯାଇଥିଲା। ବୁଧବାର ସକାଳେ ଜଙ୍ଗଲ ତଳେ ଘର କରି ରହିଥିବା ଜଇତରାମ ମାଝିଙ୍କ ପରିବାର ଲୋକ ଦୁଇ ଛୁଆ ସହ ୨ ବାଘ ପାହାଡ଼ ଶିଖରରେ ବୁଲୁଥିବା ଦେଖିବାକୁ ପାଇଥିବା କହିଛନ୍ତି । ଦିନବେଳା ଜଙ୍ଗଲ ଉପରେ ଥିବା ପଥର ଚଟାଣରେ ରହୁଛନ୍ତି । ରାତି ହେଲେ ସେମାନେ କୁଆଡେ ଚାଲି ଯାଉଛନ୍ତି ା ସେମାନେ ଶୀକାର ଉଦ୍ଦେଶ୍ୟରେ କୁଆଡେ ବୁଲୁଥିବା ଲୋକେ ଅନୁମାନ କରୁଛନ୍ତି । ସନ୍ଧ୍ୟା ହେଲେ ଲୋକେ ତାଟି କବାଟ ବନ୍ଦ କରି ରହୁଛନ୍ତି । ଜଙ୍ଗଲର ଗୋଟିଏ ପାର୍ଶ୍ୱରେ କୁକୁଡାଟାଲ, କୁକୁରୀମୁଣ୍ଡି ଗାଁ ଥିବାବେଳେ ଅନ୍ୟପଟେ ଦଲଦଲି ଗାଁ ରହିଛି । ଏହି ଗାଁରେ ଦିନବେଳା ଚାଷ ଜମିକୁ ଯିବାକୁ ଭୟ କରୁଥିବା ଚାଷୀ ତୁଳସୀ ସାହୁ, ମେଘରାଜ ମାଝି କହିଛନ୍ତି । ଏହା ଉପରେ ବନବିଭାଗ ଜାଲ ପକାଇ ବାଘକୁ ଧରିନେବା ବ୍ୟବସ୍ଥା କରିବାକୁ ଲୋକେ ଦାବି କରିଛନ୍ତି ।