ରାଞ୍ଚି,୨୭ା୭ : ଝାଡ଼ଖଣ୍ଡ ବିଧାନସଭା ପରିସରରେ କଂଗ୍ରେସ ବିଧାୟକ ଇର୍ଫାନ୍ ଅନ୍ସାରୀଙ୍କୁ ମନ୍ତ୍ରୀ ସି. ପି. ସିଂହ ‘ଜୟ ଶ୍ରୀରାମ’ କହିବାକୁ ଚାପ ପକାଯିବା ଘଟଣାର ଭିଡିଓ ଭାଇରାଲ୍ ହେବା ପରେ ଏହାକୁ ନେଇ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି। ବୁଧବାର ଏହି ଘଟଣା ଘଟିଥିବାବେଳେ ଭିଡିଓକୁ ଲୋକମାନେ ସୋସିଆଲ ମିଡିଆରେ ଭାଇରାଲ କରିଛନ୍ତି।
ବୁଧବାର ଭାରତୀୟ ଜଙ୍ଗଲ ଆଇନ-୧୯୨୭ରେ ସଂଶୋଧନ ପ୍ରସ୍ତାବ ସମ୍ପର୍କରେ ସରକାରଙ୍କ ମତ ଜାଣିବା ଲାଗି ବିରୋଧୀ ଦଳ ପକ୍ଷରୁ ଦାବି କରାଯାଇଥିଲା। ଏହି ଘଟଣାକୁ ନେଇ ଗୃହରେ ପାଟିତୁଣ୍ଡ ମଧ୍ୟ ହୋଇଥିଲା। ଶାସକ ଦଳର ନେତାମାନେ ଗୃହରେ ‘ଭାରତ ମାତା କି ଜୟ’, ‘ଜୟ ଶ୍ରୀରାମ’ ଧ୍ୱନି ଦେବାରୁ ବାଚସ୍ପତି ଗୃହକୁ ମୁଲତବୀ ରଖିଥିଲେ। ଗୃହ ବାହାରେ କଂଗ୍ରେସ ବିଧାୟକ ଇର୍ଫାନ୍ ଅନ୍ସାରୀ ଥିବାବେଳେ ମନ୍ତ୍ରୀ ସି.ପି. ସିଂହ ତାଙ୍କୁ ‘ଜୟ ଶ୍ରୀରାମ’ ଉଚ୍ଚାରଣ କରିବାକୁ ବାଧ୍ୟ କରିଥିଲେ। ବାବର କି ଚେଙ୍ଗିଜ୍ ଖାଁ’ଙ୍କ ବଂଶଧର ତୁମେ ନୁହଁ, ତୁମେ ଏହା ଉଚ୍ଚାରଣ କରିବାକୁ ବାଧ୍ୟ ବୋଲି ମନ୍ତ୍ରୀ ଚାପ ପକାଇଥିଲେ। ଅସହାୟ ଅନ୍ସାରୀ ରାମଙ୍କ ପ୍ରତି ସମସ୍ତଙ୍କ ସମ୍ମାନ ଅଛି ବୋଲି କହିଥିଲେ। ଏଭଳି ଘଟଣାକୁ କଂଗ୍ରେସ ସମାଲୋଚନା କରିଛି। ଅନ୍ସାରୀ ଏନେଇ ପ୍ରଧାନମନ୍ତ୍ରୀ ମୋଦି ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହଙ୍କୁ ଭେଟିବେ ବୋଲି କହିଛନ୍ତି। ମନ୍ତ୍ରୀ ତୁରନ୍ତ କ୍ଷମା ମାଗିବାକୁ ସେ ଦାବି କରିଛନ୍ତି।