ଝାରସୁଗୁଡା ଅଫିସ, ୨୩ା୨: ଝାରସୁଗୁଡା ଜିଲା ବ୍ରଜରାଜନଗରର କଳ୍ପନା ଦାଶ ଓ ତାଙ୍କ ଝିଅ ବବ୍ଲିଙ୍କୁ ହତ୍ୟାକାଣ୍ଡ ଘଟଣା ଦିନକୁ ଦିନ ଭିନ୍ନ ମୋଡ ନେଉଛି। ଏହି ଘଟଣାରେ ମୁଖ୍ୟ ଅଭିଯୁକ୍ତ ବ୍ରଜରାଜନଗରର ପୂର୍ବତନ ବିଧାୟକ ଅନୁପ ସାଏଙ୍କୁ ପୋଲିସ ଗିରଫ କରିବା ଦିନରୁ ଚୁପ୍ ରହିଥିବା ତାଙ୍କ ପରିବାରବର୍ଗ ଶେଷରେ ମୁହଁ ଖୋଲିଛନ୍ତି। ଶନିବାର ଅପରାହ୍ନରେ ଅନୁପଙ୍କ ସ୍ତ୍ରୀ ସୁଷମା, ପୁଅ ଶୁଭମ୍ ଓ ବଡ ଭାଇ ପ୍ରମୋଦଙ୍କ ସମେତ ପରିବାର ଅନ୍ୟମାନେ ଝାରସୁଗୁଡା ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସୁରକ୍ଷା ଦାବି କରି ବସି ରହିଛନ୍ତି। ଏମାନେ ଜିଲାପାଳଙ୍କ ଅଫିସ ଆଗରେ ବସିବା ଖବର ପାଇ ସେଠାରେ ଗଣମାଧ୍ୟମ ପ୍ରତିନିଧି ପହଞ୍ଚିଥିଲେ। ଅନୁପଙ୍କୁ ରାଜନୈତିକ ଷଡଯନ୍ତ୍ର କରି ଫସାଇ ଦିଆଯାଇଛି। ସେ ଅପରାଧୀ ପ୍ରବୃତ୍ତିର ବ୍ୟକ୍ତି ନୁହନ୍ତି। ତାଙ୍କୁ ପୋଲିସ ମିଛରେ ଗିରଫ କରିଛି। ଛତିଶଗଡ଼ ପୋଲିସ ପରିବାରର ସମସ୍ତଙ୍କୁ ଗିରଫ କରିବାକୁ ଧମକ ଦେଉଛି। ପୋଲିସ ନିକଟରେ କୌଣସି ତଥ୍ୟ ଓ ପ୍ରମାଣ ନ ଥିବା ସତ୍ତ୍ୱେ ତାଙ୍କୁ ଗିରଫ କରାଯାଇଛି। ମିଛକୁ ସତ ବୋଲି ସ୍ବୀକାର କରିବା ପାଇଁ ତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦିଆଯାଉଛି। ପୂର୍ବରୁ ଅନୁପଙ୍କୁ ବାରମ୍ବାର ନୋଟିସ ଦେଇଥିବା ପୋଲିସ ମିଛ କହୁଛି। ଘରେ କେହ ବି ଏ ନେଇ ଜାଣି ନାହାନ୍ତି। ପୋଲିସ କେବେ କେବେ ନୋଟିସ ଦେଇଛି ତାହା ସ୍ପଷ୍ଟ କରୁ। ପରିବାର ସଦସ୍ୟଙ୍କୁ ମଧ୍ୟ ପୋଲିସ ମାନସିକ ନିର୍ଯାତନା ଦେଉଛି। ବାରମ୍ବାର ଥାନାକୁ ଡାକୁଛି। ଗିରଫର ଭୟ ଦେଖାଉଛି। ଏହି ନିର୍ଯାତନା ଅସହ୍ୟ ହୋଇ ଗଲାଣି। ଅନୁପଙ୍କ ଘରଲୋକେ ଗଣମାଧ୍ୟମ ପ୍ରତିନିଧିଙ୍କୁ ଏହା କହିଛନ୍ତି। ତେବେ ଜିଲାପାଳଙ୍କ କାର୍ଯ୍ୟାଳୟ ପରିସରରେ ଅନୁପଙ୍କ ମା’ଙ୍କ ସମେତ ସମସ୍ତ ପରିବାର ବର୍ଗ ଶୀତ ରାତିରେ ବସି ରହିଥିଲେ ବି ଜିଲା ପ୍ରଶାସନର କୌଣସି ଅଧିକାରୀ ପହଞ୍ଚତ୍ ନ ଥିଲେ।