ଆମେଠି,୧୪।୧୧: ମହଙ୍ଗା ପଡ଼ିଲା ମୃତକଙ୍କ ପରିବାରଙ୍କୁ ଦୁର୍ବ୍ୟବହାର କରିବା। ଆମେଠି ଜିଲାପାଳଙ୍କ ଏଭଳି କାର୍ଯ୍ୟରେ ଅସନ୍ତୁଷ୍ଟ ହୋଇ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଜିଲାପାଳ ପ୍ରଶାନ୍ତ ଶର୍ମାଙ୍କୁ ନିଲମ୍ବିତ କରିଛନ୍ତି। ତାଙ୍କ ସ୍ଥାନରେ ଅରୁଣ କୁମାର ନୂଆ ଜିଲାପାଳ ଭାବେ ନିଯୁକ୍ତ ହୋଇଛନ୍ତି। ସୂଚନାଯୋଗ୍ୟ, ଆମେଠିର ଜଣେ ଇଟା ବ୍ୟବସାୟୀଙ୍କୁ ମଙ୍ଗଳବାର ଗୁଳିକରି ହତ୍ୟା କରାଯାଇଥିଲା। ବୁଧବାର ମୃତଦେହ ବ୍ୟବଚ୍ଛେଦ ସମୟରେ ଜିଲାପାଳ ଓ ମୃତକଙ୍କ ପରିବାରଲୋକଙ୍କ ସହ କଥା ହେଉଥିଲେ। ଏତିକିବେଳେ ହଠାତ୍ ସେ ନିଜର ଆୟତ ହରାଇ ଉକ୍ତ ପରିବାରବର୍ଗଙ୍କୁ ଦୁର୍ବ୍ୟବହାର କରିଥିଲେ। ଏହାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଉକ୍ତ ଭିଡିଓ ସର୍ବସମ୍ମୁଖକୁ ଆସିବା ପରେ ଯୋଗୀ ସରକାର ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ପୂର୍ବରୁ ମଧ୍ୟ ପ୍ରଶାନ୍ତ ନିଜ ଖରାପ ବ୍ୟବହାର ପାଇଁ ହାଇକୋର୍ଟରୁ ଦଣ୍ଡିତ ମଧ୍ୟ ହୋଇସାରିଛନ୍ତି। ଅନ୍ୟପଟେ ଏହି ଘଟଣାକୁ ନେଇ କେନ୍ଦ୍ରମନ୍ତ୍ରୀ ତଥା ଆମେଠିର ଏମ୍ପି ସ୍ମୃତି ଇରାନୀ ଟୁଇଟ କରି ଜିଲାପାଳ ପ୍ରଶାନ୍ତଙ୍କୁ ପରାମର୍ଶ ଦେଇଛନ୍ତି। ସେ କହିଛନ୍ତି, ନିଜ ବ୍ୟବହାରକୁ ପରିବର୍ତ୍ତନ କରି ନମ୍ର ଏବଂ ସମ୍ବେଦନଶୀଳ ହୁଅ। ଆମେ ସାଧାରଣ ଜନତାଙ୍କ ସେବକ, ଶାସକ ନୁହେଁ ବୋଲି ସ୍ମୃତି କହିଛନ୍ତି।