ହାଟଡିହୀ,୨୬ା୨(ଡି.ଏନ.ଏ.)-ମୃତ୍ୟୁଞ୍ଜୟଙ୍କ ବୟସ ୪୦ ବର୍ଷ। ପେସାରେ ଜଣେ ସରକାରୀ ଶିକ୍ଷକ। କିନ୍ତୁ ଛାତ୍ରୀଛାତ୍ରଙ୍କୁ ଶିକ୍ଷାଦାନ କରିବା ତାଙ୍କର ନିଶା। ଏଥିଲାଗି ସେ କୌଣସି ଅର୍ଥ ନିଅନ୍ତି ନାହିଁ। ୨୦୦୬ ଫେବୃୟାରୀ ୨୩ ତାରିଖରେ ସରକାରୀ ଶିକ୍ଷକ ଭାବେ ତାଙ୍କୁ ନିଯୁକ୍ତି ମିଳିଲା ା କିନ୍ତୁ ସରକାରୀ ଚାକିରି ପୂର୍ବରୁ ଏବଂ ଏବେ ମଧ୍ୟ ଛାତ୍ରୀଛାତ୍ରଙ୍କୁ ବିନା ମୂଲ୍ୟରେ ଶିକ୍ଷାଦାନ କରି ଶିକ୍ଷକ ଜଣକ ନିଜ ଅଞ୍ଚଳରେ ଉଦାହରଣ ପାଲଟିଥିବା ବେଳେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି।
ଆଦରରେ ଅଭିଭାବକ ଓ ଛାତ୍ରୀଛାତ୍ର ଶିକ୍ଷକଙ୍କୁ ଟୁନୁ ସାର ବୋଲି ଡାକନ୍ତି। କେନ୍ଦୁଝର ଜିଲା ହାଟଡିହୀ ବ୍ଲକ ଡଅଁର ପଞ୍ଚାୟତ ଚଷାଖଣ୍ଡ ଗ୍ରାମରେ ମୃତ୍ୟୁଞ୍ଜୟ ପଲେଇଙ୍କ ଘର। ସେ ଇଂଲିଶ ଶିକ୍ଷକ ଭାବେ ବେଶ୍ ପରିଚିତ। ନିଜ ଗାଁରୁ ଦଶମ ଶ୍ରେଣୀ ପାସ କରି ଭଦ୍ରକ କଲେଜରୁ ଯୁକ୍ତ ୨ ଓ ଯୁକ୍ତ ୩ ପାସ କରିଥିଲେ। ଏଜୁକେଶନରେ ପିଜି କରିବା ସହ ବିଏଡ ମଧ୍ୟ କରିଛନ୍ତି। ଜଣେ ଆଦର୍ଶ ଶିକ୍ଷକ ଭାବେ ମୃତ୍ୟୁଞ୍ଜୟଙ୍କୁ କାସାଣ୍ଡ୍ରା ସମ୍ମାନ, ଦିଲ୍ଲୀରେ ହିନ୍ଦୀ ଗୌରବ ଆୱାର୍ଡ ମିଳିଛି। ପ୍ରତିଦିନ ସକାଳ ୭ଟାରୁ ୯ଟା ପର୍ଯ୍ୟନ୍ତ ମୃତ୍ୟୁଞ୍ଜୟ ଛାତ୍ରୀଛାତ୍ରଙ୍କୁ ପାଠ ପଢ଼ାଇଥାନ୍ତି। ୯ଟା ପରେ ଘରକୁ ଯାଇ ଗାଧୋଇ, ଖାଇ ସ୍କୁଲକୁ ବାହାରିଥାନ୍ତି। ୪ଟା ପରେ ସ୍କୁଲରୁ ଫେରି ସାଢ଼େ ୪ଟାରେ ପୁଣି ଛାତ୍ରୀଛାତ୍ରଙ୍କୁ ପାଠ ପଢ଼ାନ୍ତି। ରାତି ୮ଟା ବାଜିଲେ ଘରକୁ ଫେରି ପରିବାର ସହ ସମୟ ବିତାନ୍ତି। ଏପରି କଟେ ତାଙ୍କର ନିତିଦିନ। ମୃତ୍ୟୁଞ୍ଜୟ କହିଛନ୍ତି ଯେ, ସମାଜରେ ଶିକ୍ଷାଦାନ ଏକ ମହତ୍ତ୍ୱପୂର୍ଣ୍ଣ କାର୍ଯ୍ୟ । ଏହା ସମସ୍ତଙ୍କ ଦ୍ୱାରା ସମ୍ଭବ ନୁହେଁ, ଏହାପାଇଁ ବହୁ ଧୈର୍ଯ୍ୟ ଦରକାର। ସେ ବଞ୍ଚିଥିବା ପର୍ଯ୍ୟନ୍ତ ଶିକ୍ଷାର ମହତ୍ତ୍ୱ ଛାତ୍ରୀଛାତ୍ରଙ୍କ ପାଖରେ ପହଞ୍ଚାଇବେ। ଛାତ୍ରୀଛାତ୍ର ଭଲ ମଣିଷ ହେଲେ ତାଙ୍କୁ ସାର୍ଥକତା ମିଳିବ ବୋଲି ସେ କହିଛନ୍ତି।