ବରେଲି,୧୪।୧୦: କଥାରେ ଅଛି ଯାହାକୁ ରଖିବେ ଅନନ୍ତ କି କରିପାରିବ ବଳବନ୍ତ। ଏହି ଲୋକ କଥାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଉତ୍ତରପ୍ରଦେଶ ବରେଲି ଜିଲାରେ। ଜଣେ ବ୍ୟକ୍ତି ନିଜର ମୃତ ଶିଶୁକୁ ଶ୍ମଶାନକୁ ପୋତିବାକୁ ନେଇଥିବା ବେଳେ ସେଠାରୁ ଏକ ଜୀବନ୍ତ ଶିଶୁ ଉଦ୍ଧାର ହୋଇଛି। ଶିଶୁଟିକୁ ଭଗବାନଙ୍କ ଉପହାର ଭାବି ବ୍ୟକ୍ତି ଜଣଙ୍କ ନିଜ ଘରକୁ ଆଣିଛନ୍ତି। ସୂଚନାଯୋଗ୍ୟ, ବରେଲିର ସିବିଗଞ୍ଜ ନିକଟସ୍ଥ ଓ୍ବେଷ୍ଟିର୍ନ କଲୋନୀରେ ରହୁଥିବା ହିତେଶ ସିରୋହୀଙ୍କ ଘରେ ଗୁରୁବାର ଏକ ଶିଶୁକନ୍ୟା ଜନ୍ମ ନେଇଥିଲା। ଜନ୍ମ ନେବାର କିଛି ଘଣ୍ଟା ମଧ୍ୟରେ ଶିଶୁଟିର ମୃତ୍ୟୁ ହୋଇଯାଇଥିଲା। ହିତେଶ ଓ ପରିବାରର କିଛି ସଦସ୍ୟ ମୃତ ଶିଶୁକନ୍ୟାକୁ ପୋତିବା ପାଇଁ ଶ୍ମଶାନକୁ ଯାଇଥିଲେ। ସେଠାରେ ୩ ରୁ ୪ ଫୁଟ ପର୍ଯ୍ୟନ୍ତ ଖାଲ ଖୋଳୁଥିବା ବେଳେ କୋଦାଳଟି ଏକ ମାଟି ହାଣ୍ଡିରେ ବାଜିଥିଲା। ମାଟି ହାଣ୍ଡିକୁ ବାହାର କରାଯିବା ପରେ ସେଥି ମଧ୍ୟରୁ ଏକ ଜୀବନ୍ତ ନବଜାତ ଶିଶୁକନ୍ୟାକୁ ଦେଖିବାକୁ ପାଇଥିଲେ। ହିତେଶ ସଙ୍ଗେ ସଙ୍ଗେ ଶିଶୁକୁ କୋଳାଗ୍ରତ କରି ଭଗବାନଙ୍କ ଉପହାର ଭାବି ଘରକୁ ନେଇଆସିଥିଲେ। ବର୍ତ୍ତମାନ ଶିଶୁଟିର ବରେଲି ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସା କରାଯାଉଛି। ଶିଶୁଟିର ସ୍ବାସ୍ଥ୍ୟାବସ୍ଥା ଏବେ ସ୍ଥିର ରହିଛି। ଅନ୍ୟପଟେ ଶିଶୁକନ୍ୟାକୁ ଜୀବନ୍ତ ଅବସ୍ଥାରେ କିଏ ପୋତିଛି ସେନେଇ ଖୋଳତାଡ କରାଯାଉଛି ବୋଲି ବରିଷ୍ଠ ପୋଲିସ ଅଧିକାରୀ ସୂଚନା ଦେଇଛନ୍ତି।