ଭୁବନେଶ୍ୱର,୧୨ା୭(ବ୍ୟୁରୋ) : ରାଜ୍ୟରେ ଥିବା ୭ଟି ସରକାରୀ ଓ ଗୋଟିଏ ଘରୋଇ ମେଡିକାଲ କଲେଜର ଏମ୍ବିବିଏସ୍ ଓ ବିଡିଏସ୍ ପାଠ୍ୟକ୍ରମରେ ପ୍ରଥମ ପର୍ଯ୍ୟାୟ ପ୍ରୋଭିଜନାଲ ନାମଲେଖା ବୁଧବାର ଶେଷ ହୋଇଛି। ନାମଲେଖା ପ୍ରକ୍ରିୟାରେ ଏମ୍ବିବିଏସ୍ରେ ମୋଟ ୯୩୩ ସିଟ୍ ପୂରଣ ହୋଇଥିବାବେଳେ ବିଡିଏସ୍ରେ ୩୭ ଜଣ ନାମ ଲେଖାଇଛନ୍ତି। ଏନେଇ ଓଜେଇଇ ଅଧ୍ୟକ୍ଷ ସୁଦୀପ କୁମାର ଚାନ୍ଦ ସୂଚନା ଦେଇଛନ୍ତି। ରାଜ୍ୟ କୋଟା ପାଇଁ ହେଉଥିବା ଏହି ନାମଲେଖାରେ କଟକସ୍ଥିତ ଏସ୍ସିବି ମେଡିକାଲ କଲେଜର ୨୧୨ଟି ରାଜ୍ୟ କୋଟା ଏମ୍ବିବିଏସ୍ ସିଟ୍ ମଧ୍ୟରୁ ୧୭୩ ସିଟ୍ ପୂରଣ ହୋଇଛି। ସେହିଭଳି ବ୍ରହ୍ମପୁରସ୍ଥିତ ଏମ୍କେସିଜି ମେଡିକାଲ କଲେଜର ୨୧୨ ସିଟ୍ ମଧ୍ୟରୁ ୧୯୮ ସିଟ୍, ବୁର୍ଲାସ୍ଥିତ ଭିଏସ୍ଏସ୍ ମେଡିକାଲ କଲେଜର ୧୭୦ ସିଟ୍ରୁ ୧୫୯, ବାରିପଦା ମେଡିକାଲ କଲେଜର ୧୦୬ ସିଟ୍ରୁ ୧୦୦ ଏବଂ କୋରାପୁଟ ମେଡିକାଲ କଲେଜର ୯୯, ବାଲେଶ୍ୱର ମେଡିକାଲ କଲେଜରେ ୮୨, ବଲାଙ୍ଗୀର ମେଡିକାଲ କଲେଜର ୭୭ଟି ସିଟ୍ ପୂରଣ ହୋଇଛି। ଏକମାତ୍ର ଘରୋଇ ହାଇଟେକ୍ ମେଡିକାଲ କଲେଜର ୪୫ଟି ଏମ୍ବିବିଏସ୍ ସିଟ୍ ପୂରଣ ହୋଇଛି। ସେହିଭଳି ବିଡିଏସ୍ ପାଠ୍ୟକ୍ରମରେ ଏସ୍ସିବି ମେଡିକାଲ କଲେଜର ୩୨, ଭୁବନେଶ୍ୱର ହାଇଟେକ୍ ମେଡିକାଲ କଲେଜର ୫ଟି ସିଟ୍ରେ ନାମଲେଖା ହୋଇଛି। ଏହି କଲେଜଗୁଡ଼ିକରେ ମୋଟ ୧୪୦୦ ସିଟ୍ ରହିଥିବାବେଳେ ରାଜ୍ୟକୋଟାରେ ଏବେ ୧୨୧୮ ସିଟ୍ ପାଇଁ କାଉନସେଲିଂ କରାଯାଉଛି।