ଭୁବନେଶ୍ୱର,୩ |୧୦ – ମହାନଦୀ କୋଲ୍ ଫିଲ୍ଡସ ଲିମିଟେଡ୍ (ଏମ୍ସିଏଲ୍) ତାଳଚେରରେ ସ୍ଥାପନ କରିଥିବା ୫୦୦ ବେଡ୍ ବିଶିଷ୍ଟ ଏହାର ଷ୍ଟେଟ୍ ଅଫ୍ ଆର୍ଟ ମେଡିକାଲ ପ୍ରତିଷ୍ଠାନର ପରିଚାଳନା ଟିମ୍ ସୋର୍ସିଂ କରିବ। ଉକ୍ତ ହସ୍ପିଟାଲର ପରିଚାଳନା ଲାଗି ପ୍ରତିଷ୍ଠିତ ଅନୁଷ୍ଠାନଗୁଡିକୁ ଆମନ୍ତ୍ରଣ କରାଯିବ ବୋଲି ଏମ୍ସିଏଲ୍ ପକ୍ଷରୁ ନିଷ୍ପତ୍ତି ହୋଇଛି। ମହାନଦୀ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ଆଣ୍ଡ ରିସର୍ଚ୍ଚ(ମିମ୍ସାର)ର ପରିଚାଳନା ଲାଗି ରାଜ୍ୟ ସରକାର ଅକ୍ଷମତା ପ୍ରକାଶ କରିବାରୁ ଏଭଳି ପଦକ୍ଷେପ ନିଆଯାଇଥିବା କମ୍ପାନୀ କର୍ତ୍ତୃପକ୍ଷ ବୁଧବାର ପ୍ରକାଶ କରିଛନ୍ତି। ଏହି ହସ୍ପିଟାଲ ଲାଗି ଭିତ୍ତିଭୂମି ପ୍ରସ୍ତୁତ ହୋଇ ରହିଛି। ଆସନ୍ତା ବର୍ଷଠାରୁ ପ୍ରତିଷ୍ଠାନକୁ ଚଳାଇବା ଲାଗି ବିଭିନ୍ନ ଆନୁଷଙ୍ଗିକ ଧାରା ଶୀଘ୍ର ଶେଷ କରିବାକୁ ଏକ ଉଚ୍ଚ କ୍ଷମତା ସମ୍ପନ୍ନ କମିଟି ଗଠନ କରାଯାଇଥିବା ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ବି.ଏନ୍.ଶୁକ୍ଳା ସୂଚନା ଦେଇଛନ୍ତି। ହସ୍ପିଟାଲକୁ କର୍ପୋରେଟ ସାମାଜିକ ଦାୟିତ୍ୱବୋଧ କାର୍ଯ୍ୟକ୍ରମ ଅନ୍ତର୍ଗତ ୪୯୨ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଛି। ଏମ୍ବିବିଏସ୍ ଲାଗି ଏଠାରେ ୧୦୦ ସିଟ୍ ରହିବ। ନିଟ୍-ୟୁଜି ଦ୍ୱାରା ୨୦୨୦-୨୧ ବର୍ଷଠାରୁ ନାମଲେଖା ହେବ। ବିଭିନ୍ନ ସଂସ୍ଥାଙ୍କଠାରୁ ଏମ୍ସିଏଲ୍ ବର୍ତ୍ତମାନ ସୂଚନା ସଂଗ୍ରହ କରୁଛି। ଏକ୍ସପ୍ରେଶନ ଅଫ ଇଣ୍ଟରେଷ୍ଟ (ଇଓଆଇ) ଆମନ୍ତ୍ରଣ କରିବା ନେଇ ଏବେ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ରହିଛି। ଶୀଘ୍ର ଏନେଇ ବିଜ୍ଞପ୍ତି ଜାରି କରାଯିବ। ବିଭିନ୍ନସଂସ୍ଥା ଉକ୍ତ ହସ୍ପିଟାଲ ପରିଚାଳନା ଲାଗି ଆଗ୍ରହ ଦେଖାଉଥିବା ଶୁକ୍ଳା କହିଛନ୍ତି।