ବାରିପଦା ଅଫିସ,୧୬ା୧୨- ମୟୂରଭଞ୍ଜ ଜିଲା ବେତନଟୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବାରଣ୍ଡାରୁ ସୋମବାର ଅପରାହ୍ନରେ ଏକ ଶିଶୁ କନ୍ୟାଙ୍କୁ ଉଦ୍ଧାର କରାଯାଇଛି। ଏହି ଶିଶୁ କନ୍ୟା ପ୍ରାୟ ୧୦ ଦିନ ତଳେ ଜନ୍ମ ହୋଇଥିବା ମେଡିକାଲ କର୍ମଚାରୀମାନେ କହିଛନ୍ତି।
ସୂଚନା ଅନୁଯାୟୀ, ମେଡିକାଲ ପଛପଟ ଗେଟରେ କେହି ଜଣେ ଆସି ଏହି ଶିଶକନ୍ୟାଙ୍କୁ ମେଡିକାଲ ବାରଣ୍ଡାରେ ଛାଡ଼ି ଦେଇ ଯାଇଥିଲେ। ଶିଶୁ କନ୍ୟାଙ୍କ କାନ୍ଦ ଶୁଣି ଜଣେ ରୋଗୀଙ୍କ ସମ୍ପର୍କୀୟ ଡ୍ୟୁଟିରେ ଥିବା ନର୍ସମାନଙ୍କୁ ଖବର ଦେଇଥିଲେ। ପରେ ନର୍ସମାନେ ଏହି ଶିଶୁଙ୍କୁ ଉଦ୍ଧାର କରି ଚିକିତ୍ସା ଆରମ୍ଭ କରିଛନ୍ତି। ଶିଶୁକନ୍ୟା ସୁସ୍ଥ ଥିବା ଜଣାପଡିଛି। ତେବେ କିଏ ଏହି ଶିଶୁ କନ୍ୟାଙ୍କୁ ଏଠାରେ ଛାଡ଼ି ଯାଇଛି ସେ ନେଇ ତଦନ୍ତ କରାଯିବ ବୋଲି ଏନଏଚଏମର ପ୍ରୋଗ୍ରାମ ମ୍ୟାନେଜର ସସ୍ମିତା ଦାସ କହିଛନ୍ତି। ମେଡିକାଲର ସିସିଟିଭି ଫୁଟେଜକୁ ଆଧାର କରି ତଦନ୍ତ କରାଯିବ। ନିୟମ ଅନୁଯାୟୀ ଉଦ୍ଧାର ଶିଶୁଙ୍କୁ ଥଇଥାନ କରାଯିବ ବୋଲି ମଧ୍ୟ ସେ କହିଛନ୍ତି। ଉଲ୍ଲେଖଯୋଗ୍ୟ ଯେ, ଏହି ଥାନା ଅଧୀନ କେନ୍ଦୁଛାଟିଆ ଜଙ୍ଗଲରୁ ଗତ ୭ ତାରିଖରେ ଏକ ଶିଶୁ କନ୍ୟା ଉଦ୍ଧାର ହୋଇଥିଲେ। ଏହି ଦୁଇ ଘଟଣାକୁ ଅନୁଧ୍ୟାନ କଲେ ଶିଶୁ କନ୍ୟା ଏବେବି ଅଲୋଡା ସାଜିଥିବା ପ୍ରମାଣିତ ହେଉଛି।