ବେଙ୍ଗାଲୁରୁ,୭।୭: କଂଗ୍ରେସ-ଜେଡିଏସର ୧୧ ବିଧାୟକ ଶନିବାର ଇସ୍ତଫା ଦେବା ପରେ ଅଡ଼ୁଆରେ ପଡିଯାଇଛି କର୍ନାଟକର ମେଣ୍ଟ ସରକାର। ମୁଖ୍ୟମନ୍ତ୍ରୀ ଏଚଡି କୁମାରସ୍ବାମୀ ଆମେରିକା ଗସ୍ତରେ ଥିବାବେଳେ ଏଭଳି ଘଟଣା ଘଟିଛି। ଫଳରେ ସରକାର ଗଢ଼ିବା ପାଇଁ ରାଜନୀତି ଆରମ୍ଭ ହୋଇଛି। କୁମାରସ୍ବାମୀ ସରକାର ସୂତା ଖିଅରେ ଝୁଲୁଥିବାବେଳେ ରବିବାର ସନ୍ଧ୍ୟାରେ ବେଙ୍ଗାଲୁରୁ ଫେରି ତୁରନ୍ତ ଏକ ବୈଠକ ଡକାଇଛନ୍ତି। ସନ୍ଧ୍ୟା ୭.୩୦ରେ ବୈଠକ ଆରମ୍ଭ ହେବ ବୋଲି ସୂଚନା ମିଳିଛି। ଇତିମଧ୍ୟରେ ଇସ୍ତଫା ଦେଇଥିବା ବିଧାୟକଙ୍କୁ ବୁଝାଇବା ପାଇଁ ପ୍ରୟାସ ଜାରି ରହିଛି। ସୂଚନାଯୋଗ୍ୟ, ୨୨୪ ଆସନ ବିଶିଷ୍ଟ ବିଧାନସଭାରେ ମେଣ୍ଟ ସରକାରକୁ ୧୧୮ଟି ସମର୍ଥନ ଥିବା ବେଳେ ଯଦି ୧୩ ଜଣଙ୍କ ଇସ୍ତଫା ଗ୍ରହଣ କରିନିଆଯାଏ, ସରକାର ସଙ୍କଟରେ ପଡିବାର ସମ୍ଭାବନା ରହିଛି। ବାଚସ୍ପତି ରମେଶ କୁମାର କହିଛନ୍ତି ଯେ, ସରକାର ରହିବ କି ନାହିଁ ତାହା ଜୁଲାଇ ୧୨ରେ ବିଧାନସଭା ଅଧିବେଶନ ଆରମ୍ଭ ହେଲେ ସ୍ପଷ୍ଟ ହେବ।