ଲାଉସେନ,୨୫।୪(ଏପି): କରୋନା ଭାଇରସ ମହାମାରୀ ମୁକାବିଲା ପାଇଁ ବିଶ୍ୱ ଫୁଟବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି। କରୋନା ଭାଇରସ ପାଇଁ ଦେଖାଦେଇଥିବା ସ୍ଥିତିର ମୁକାବିଲ ପାଇଁ ଖର୍ଚ୍ଚ ଚଳାଇବାକୁ ଫିଫା ସବୁ ମେମ୍ବର ଆସୋସିଏଶନଗୁଡିକୁ ୫ ଲକ୍ଷ ଆମେରିକୀୟ ଡଲାର ପ୍ରଦାନ କରିବ ବୋଲି ଘୋଷଣା କରିଛି। ୨୧୧ ମେମ୍ବର ଆସୋସିଏଶନଗୁଡିକ ମଧ୍ୟ ପ୍ରତ୍ୟେକ ଆସୋସିଏଶନ ୬ ମିଲିୟନ ଡଲାର ଲେଖାଏ ପାଇବାକୁ ହକ୍ଦାର ହେବେ। ଫିଫା ବିଶ୍ୱକପ୍ ପ୍ରତି ୪ ବର୍ଷରେ ଥରେ ଆୟୋଜନ ହୋଇଥାଏ। ଫଳରେ ଏହି ଅର୍ଥ ୪ ବର୍ଷରେ ହିଁ ଖର୍ଚ୍ଚ କରାଯିବ।
ଏହି ଅର୍ଥ ବିଭିନ୍ନ ମାନଦଣ୍ଡକୁ ବିଚାର କରି ପ୍ରଦାନ କରାଯିବ ଓ ଏହାର ଅଡିଟ୍ ମଧ୍ୟ କରାଯିବ ବୋଲି ଫିଫା କହିଛି। ଅର୍ଥ ଆବଶ୍ୟକ କରୁଥିବା ମେମ୍ବର ଆସୋସିଏଶନଗୁଡିକୁ ଏହି ଅର୍ଥ ମିଳିବା ଉପରେ ଫିଫା ଜୋର ଦେଇଛି। ଫିଫାର ଇମର୍ଜେନ୍ସି ଫଣ୍ଡ ବା ଆପାତକାଳୀନ ଅର୍ଥରାଶି ୨.୭ ବିଲିୟନ ଆମେରିକୀୟ ଡଲାରରୁ ଆବଶ୍ୟକ ପଡିଲେ ପର୍ଯ୍ୟାପ୍ତ ପରିମାଣ ଅର୍ଥ ଖର୍ଚ୍ଚ କରାଯିବ ବୋଲି ପୂର୍ବରୁ ଫିଫା କହିସାରିଛି। ପରବର୍ତ୍ତୀ କିସ୍ତି ପ୍ରଦାନର ତାରିଖ ଜୁଲାଇରେ ରହିଛି। ଗତବର୍ଷର ବାକି ଅର୍ଥ ସହିତ ଏହି କିସ୍ତିରେ ସବୁ ପରିମାଣର ଅର୍ଥ ପ୍ରଦାନ କରାଯିବ ବୋଲି ଫିଫା କହିଛି।