ବିଞ୍ଝାରପୁର,୬ା୧(ଡି.ଏନ.ଏ)- ପ୍ରସିଦ୍ଧ ବରୁଣେଶ୍ୱର ମେଳା ଆଉ ମାତ୍ର ୮ ଦିନ ବାକି ରହିଛି। ମେଳା ସୁପରିଚାଳନା ପାଇଁ ଆୟୋଜକଙ୍କ ମଧ୍ୟରେ ତତ୍ପରତା ପ୍ରକାଶ ପାଇଛି। ଚଳିତ ବର୍ଷ ମେଳା ପାଇଁ ବରୁଣେଶ୍ୱର ମନ୍ଦିରରେ ରଙ୍ଗ ଦେବାରୁ ଆରମ୍ଭ କରି ପୋଖରୀ ସଫା କରାଯାଇଛି। ସାହିତ୍ୟ ଅନୁଷ୍ଠାନ ଅଖିଳଚକ୍ର ତାର କାର୍ଯ୍ୟକ୍ରମ ସଫଳ କରିବା ପାଇଁ ଲାଗିପଡିଛି। ସେହିପରି ଅପେରା ଦଳଗୁଡ଼ିକ ବ୍ୟାନର, ହୋର୍ଡିଂ ଆଦି ପ୍ରସ୍ତୁତ କରି ବିଭନ୍ନ ବଜାରରେ ବିଜ୍ଞାପନ ଦେବା ଆରମ୍ଭ କରିଦେଇଥିଛନ୍ତି। ବରୁଣେଶ୍ୱର ପରିଚାଳନା କମିଟି ପକ୍ଷରୁ ବ୍ୟବସାୟୀଙ୍କ ନିମନ୍ତେ ସ୍ଥାନ ସଂରକ୍ଷଣ ପାଇଁ ମେଳା ପରିଚାଳନା ଓ ବରୁଣେଶ୍ୱର ଉନ୍ନୟନ କିମିଟି ପକ୍ଷରୁ ସ୍ଥାନ ବଣ୍ଟନ କାର୍ଯ୍ୟ ଆରମ୍ଭ କରାଯାଇଛି। ବରୁଣେଶ୍ୱର ମେଳାରେ ଦୋକାନ ଖୋଲିବା ପାଇଁ ଚାହୁଁଥିବା ବ୍ୟବସାୟୀମାନେ ସେମାନଙ୍କର ଭୂମି ସଂରକ୍ଷଣ କରିବାବେଳେ ପଞ୍ଚାୟତ ମେଳା ପରିଚାଳନା କମିଟି ନିକଟରେ ଆଧାରକାର୍ଡ ବାଧ୍ୟତାମୂଳକ କରାଯାଇଛି। ପୂର୍ବ ନିର୍ଦ୍ଧାରିତ ବିଜ୍ଞାପନ ଅନୁଯାୟୀ, ସୋମବାର ପୂର୍ବାହ୍ନରୁ ବରୁଣେଶ୍ୱର କଲ୍ୟାଣ ମଣ୍ଡପରେ ପଞ୍ଚାୟତ ମେଳା ପରିଚାଳନା କମିଟି ପକ୍ଷରୁ ୭ନଂ ରସିଦ କାଟି ନିଜ ବ୍ୟବସାୟ ପାଇଁ ସ୍ଥାନ ସଂରକ୍ଷଣ କରୁଥିବା ଦେଖାଯାଇଛି। ପଞ୍ଚାୟତ ମେଳା ପରିଚାଳନା କମିଟି ପକ୍ଷରୁ ସ୍କୋୟାର ଫୁଟ ୧୦ଟଙ୍କା ଆଦାୟ କରୁଥିବା ଜଣାପଡିଛି। ତେବେ ମେଳା ପଡିଆରେ ସ୍ଥାନ ସଂରକ୍ଷଣ ପାଇଁ ବ୍ୟବସାୟୀଙ୍କ ମଧ୍ୟରେ ଅହେତୁକ ଭିଡ ପରିଲକ୍ଷିତ ହେଉଛି। ଚଳିତ ବର୍ଷ ବରୁଣେଶ୍ୱର ମେଳା ପଡ଼ିଆ ସଂଲଗ୍ନ ବେସରକାରୀ ସ୍ଥାନଗୁଡ଼ିକରେ ଦୋକାନ ଦେଇଥିବା ବ୍ୟକ୍ତି ବିଶେଷଙ୍କଠାରୁ ମେଳା ପରିଚାଳନା କମିଟି ରାଜସ୍ବ ଆଦାୟ କରିବ ବୋଲି ସୂଚନା ମିଳିଛି। ବର୍ଜ୍ୟବସ୍ତୁ ସୁପରିଚାଳନା ପାଇଁ ମେଳାରେ ଦୋକାନ ଦେଇଥିବା ବ୍ୟକ୍ତି ବିଶେଷଙ୍କୁ ନିଜ ଦୋକାନ ଓ ଅନୁଷ୍ଠାନ ସମ୍ମୁଖରେ ଡଷ୍ଟବିନ ଲଗାଇବା ପାଇଁ ପରିଚାଳନା କମିଟି ପକ୍ଷରୁ ବାଧ୍ୟତାମୂଳକ କରାଯାଇଛି। ଜିଲାପାଳଙ୍କ ନିର୍ଦ୍ଦେଶ ମୁତାବକ ଚଳିତବର୍ଷ ମେଳା ପଲିଥିନ ମୁକ୍ତ ହେବ ବୋଲି ସରପଞ୍ଚ ଦେବାନନ୍ଦ ମଲ୍ଲିକ ସୂଚନା ଦେଇଛନ୍ତି।