ରିୟାଦ,୧୬।୧୧- ଅନ୍ତର୍ଜାତୀୟ ବାସନ୍ଦାଦେଶ ପରେ ଫେରିଥିବା ଲିଓନେଲ ମେସିଙ୍କ ଗୋଲ ଯୋଗୁ ୧-୦ ଗୋଲରେ ବ୍ରାଜିଲକୁ ସୌଦି ଆରବରେ ହରାଇ ଦେଇଛି। ଦକ୍ଷିଣ ଆମେରିକା ଫୁଟ୍ବଲ କନଫେଡେରେଶନକୁ ଦୁର୍ନୀତି ଗ୍ରସ୍ତ କହି ବାର୍ସିଲୋନା ଷ୍ଟ୍ରାଇକର ୪ ଅନ୍ତର୍ଜାତୀୟ ମ୍ୟାଚ୍ରୁ ବାସନ୍ଦ ହୋଇଥିଲେ। ତାଙ୍କ ଗୋଲ ଯୋଗୁ ସୁପର କ୍ଲାସିକୋ ଅଭିହିତ ହେଉଥିବା ମ୍ୟାଚ୍କୁ ଜିତି ନେଇଛି ଆର୍ଜେଣ୍ଟିନା। ଅନ୍ତିମ ଥର ଦୁଇ ଚିରପ୍ରତିଦ୍ୱନ୍ଦ୍ୱୀ ବ୍ରାଜିଲ ଓ ଆର୍ଜେଣ୍ଟିନା କୋପା ଆମେରିକା ସେମିଫାଇନାଲରେ ପରସ୍ପରକୁ ଭେଟିଥିଲେ। ବ୍ରାଜିଲ ୨-୦ ଗୋଲରେ ମ୍ୟାଚ୍ ଜିତି ଫାଇନାଲରେ ପ୍ରବେଶ କରିଥିଲା।
ମ୍ୟାଚ୍ର ୯ମ ମିନିଟ୍ରେ ବ୍ରାଜିଲ ନିକଟରେ ଖାତା ଖୋଲିବାର ସୁବର୍ଣ୍ଣ ସୁଯୋଗ ଥିଲା। ମିଳିଥିବା ପେନାଲ୍ଟି କିକ୍କୁ ଗାବ୍ରିଏଲ ଜିସସ ହାତଛଡ଼ା କରିଥିଲେ। ଏହାର ୫ ମିନିଟ୍ ପରେ ଆର୍ଜେଣ୍ଟିନା ମଧ୍ୟ ପେନାଲ୍ଟି ହାତେଇଥିଲା। କିନ୍ତୁ ମେସିଙ୍କ ଉଦ୍ୟମକୁ ବ୍ରାଜିଲିଆନ ଗୋଲକିପର ଆଲିସନ ବେକାର କରି ଦେଇଥିଲେ। ତୁରନ୍ତ ବାର୍ସିଲୋନା ଷ୍ଟ୍ରାଇକର ଏକ ଫିଲ୍ଡ ଗୋଲ ଦେଇ ଆର୍ଜେଣ୍ଟିନାକୁ ୧-୦ ଗୋଲର ଅଗ୍ରଣୀ ଆଣି ଦେଇଥିଲେ। ଦଳୀୟ ଅଗ୍ରଣୀ ବ୍ୟବଧାନକୁ ଦୁଇ ଗୁଣ କରିବା ପାଇଁ ମେସି ପାଇଥିବା ଦୁଇଟି ସୁଯୋଗର ଫାଇଦା ଉଠାଇ ପାରି ନ ଥିଲେ। ପିଏସ୍ଜି ଷ୍ଟ୍ରାଇକର ନେମାରଙ୍କ ବିନା ଖେଳୁଥିବା ବ୍ରାଜିଲ ପ୍ରତିପକ୍ଷ ଗୋଲପୋଷ୍ଟ ଉପରେ ଖୁବ୍ କମ୍ ଆକ୍ରମଣ କରିଥିଲା। ଦଳ ୪୧ ଫାଉଲ ଓ ଖେଳାଳିଙ୍କୁ ୬ଟି ହଳଦିଆ କାର୍ଡ ମିଳିଥିଲା।