ପ୍ୟାରିସ,୦୧।୧୨(ଏଏଫ୍ପି)- ଚଳିତବର୍ଷର ସମ୍ମାନଜନକ ବାଲୋନ ଡି’ଅର ପୁରସ୍କାର ପୁରୁଷ ବର୍ଗରେ ଆର୍ଜେଣ୍ଟିନାର ଲିଓନେଲ ମେସି ଓ ମହିଳା ବର୍ଗରେ ବିଶ୍ୱକପ୍ ଚାମ୍ପିୟନ ଆମେରିକା ଦଳର ଷ୍ଟାର ମେଗାନ ରାପିନୋଙ୍କୁ ମିଳିପାରେ ବୋଲି ଆଶା କରାଯାଉଛି। ଏହି ପୁରସ୍କାର ସୋମବାର ସ୍ଥାନୀୟ ଚାଟଲେଟ ଥିଏଟରଠାରେ ଅନୁଷ୍ଠିତ ହେବାକୁ ଥିବା ଜାକଜମକ୍ୟ ଉତ୍ସବରେ ପ୍ରଦାନ କରାଯିବ। ଏଥିରେ ବିଶ୍ୱ ଫୁଟବଲ ବହୁ ଜଣାଶୁଣା ନାମ ଯୋଗଦେବେ। ମହିଳା ବିଭାଗର ପୁରସ୍କାର ରାପିନୋଙ୍କୁ ମିଳିବାର ବିଶେଷ ସମ୍ଭାବନା ରହିଛି। କାରଣ ଚଳିତବର୍ଷ ତାଙ୍କ ପ୍ରତିନିଧିତ୍ୱରେ ଆମେରିକା ତା’ର ମହିଳା ଫିଫା ବିଶ୍ୱକପ୍ ଟାଇଟଲ ବଜାୟ ରଖିଥିଲା। ଅନ୍ୟପକ୍ଷରେ ୨୦୧୮ରେ କ୍ରୋଏସିଆର ଲୁକା ମୋଡ୍ରିଚ୍ ପୁରୁଷ ବିଭାଗର ସମ୍ମାନ ଜିତିବା ପରେ ୧୨ ମାସ ହେଲା ଅନିଶ୍ଚିତତା ଜାରି ରହିଛି। ଦୀର୍ଘ ୧୦ ବର୍ଷର ବ୍ୟବଧାନ ପରେ ମେସି ଓ ପର୍ତ୍ତୁଗାଲର କ୍ରିଷ୍ଟିଆନୋ ରୋନାଲ୍ଡୋଙ୍କ ବ୍ୟତୀତ ଅନ୍ୟ କୌଣସି ଖେଳାଳି ବାଲୋନ ଡି’ଅର ପୁରସ୍କାର ହାତେଇଥିଲେ। ଏଥର ପୁରସ୍କାର ମେସି ହାତେଇ ପାରନ୍ତି। ୩୨ ବର୍ଷୀୟ ମେସି ଗତ ଲା’ ଲିଗା ଲିଗ୍ରେ ସର୍ବାଧିକ ୩୬ ଗୋଲ କରିଥିଲେ, ଯାହାଫଳରେ ବାର୍ସିଲୋନା ଟାଇଟଲ ବଜାୟ ରଖିଥିଲା। କିନ୍ତୁ କୋପା ଆମେରିକା ଟୁର୍ନାମେଣ୍ଟରେ ସେ ଭଲ ପ୍ରଦର୍ଶନ କରିପାରି ନ ଥିଲେ। ତାଙ୍କ ବ୍ୟତୀତ ପୁରସ୍କାର ପାଇଁ ୩୦ ନୋମିନଙ୍କ ତାଲିକାରେ ଲିଭରପୁଲ ଡିଫେଣ୍ଡର ବିର୍ଗିଲ ଭାନ ଡିଜକଙ୍କ ନାମ ମଧ୍ୟ ରହିଛି।