ନୂଆଦିଲ୍ଲୀ,୧।୯: ଜମ୍ମୁ-କଶ୍ମୀରରେ ଅନୁଚ୍ଛେଦ ୩୭୦ ହଟାଇ ଦିଆଯିବା ପରେ ସେଠାରେ ସ୍ଥିତି ସ୍ବାଭାବିକ ରଖିବାକୁ ସରକାର ସବୁ ପ୍ରକାର ଉଦ୍ୟମ ଜାରି ରଖିଛନ୍ତି। ଅନ୍ୟପଟେ ଏଠାରେ ନଜରବନ୍ଦୀଥିବା ନେତା ମେହେବୁବା ମୁଫତି ଓ ଓମାର ଅବଦୁଲ୍ଲାଙ୍କୁ ତାଙ୍କ ପରିବାର ସଦସ୍ୟଙ୍କ ସହ ସାକ୍ଷାତ୍ କରିବାକୁ ଅନୁମତି ମିଳିଛି। ଏମାନେ ଗତ ଅଗଷ୍ଟରୁ ନଜରବନ୍ଦୀ ଥିବା ବେଳେ ପରିସ୍ଥିତିକୁ ଶାନ୍ତ ରଖିବାକୁ ସରକାର ଏପର୍ଯ୍ୟନ୍ତ ସେମାନଙ୍କୁ ମୁକୁଳାଇ ନାହାଁନ୍ତି। ତେବେ ଶୁକ୍ରବାର ନଜରବନ୍ଦୀ ଥିବା ଅନ୍ୟ କେତେଜଣ ନେତାଙ୍କୁ ଛାଡିଦେବା କଥା ସରକାର ଚିନ୍ତା କରିଥିବା ବେଳେ ଏବେ ସେମାନଙ୍କୁ ପରିବାର ସଦସ୍ୟଙ୍କ ସହ ସାକ୍ଷାତ୍ କରିବାକୁ ଅନୁମତି ଦେବା ଏକ ନୂଆ ପଦକ୍ଷେପ ବୋଲି କୁହାଯାଉଛି। ତେବେ ଏମାନଙ୍କୁ ମାତ୍ର ୨୦ ମିନିଟ୍ ପାଇଁ ଏହି ସୁଯୋଗ ଦିଆଯାଉଛି। ସୂଚନାଯୋଗ୍ୟ, ଯେବେଠାରୁ ଓମାର ଅବଦୁଲ୍ଲା ନଜରବନ୍ଦୀ ଅଛନ୍ତି ସେବେଠାରୁ ସେ ତାଙ୍କ ପରିବାର ସଦସ୍ୟଙ୍କ ସହ ମାତ୍ର ୨ ଥର ସାକ୍ଷାତ୍ କରିଥିବା ବେଳେ ବକରି ଇଦ୍ରେ କେବଳ ଫୋନ୍ ଯୋଗେ କଥା ହୋଇଥିଲେ।