ଭୁବନେଶ୍ୱର,୨୫ା୧୨(ବ୍ୟୁରୋ):ଚାଷୀଙ୍କ ପ୍ରତି ବିଶ୍ୱାସଘାତକତା କରାଯାଇଛି। ଏହାର ପ୍ରତିବାଦରେ ନବ ନିର୍ମାଣ କୃଷକ ସଙ୍ଗଠନ ରାଷ୍ଟ୍ରୀୟ ସଂଯୋଜକ ଆସନ୍ତା ୨୬ରୁ ଅନଶନରେ ବସିବେ। ମଙ୍ଗଳବାର ନବ ନିର୍ମାଣ କୃଷକ ସଙ୍ଗଠନର ରାଜ୍ୟ କାର୍ଯ୍ୟକାରିଣୀ ବୈଠକରେ ଅଧ୍ୟକ୍ଷତା କରି ରାଜ୍ୟ ସଂଯୋଜକ ଶେଷଦେବ ନନ୍ଦ କହିଛନ୍ତି ଯେ, ସଙ୍ଗଠନକୁ ସରକାରଙ୍କ ଠାରୁ ଦାବି ହାସଲ କରିବା ସକାଶେ ଯେତିକି ଜନଶକ୍ତିର ଆବଶ୍ୟକତା ଅଛି ପାଣ୍ଠିର ମଧ୍ୟ ସେତିକି ଆବଶ୍ୟକତା ରହିଛି। ଏଣୁ ଗୋଟିଏ ମାସରେ ସମସ୍ତ ଛାମୁଆ କର୍ମୀ, ବ୍ଲକ ସଂଯୋଜକ ଏବଂ ଜିଲା ସଂଯୋଜକ ପ୍ରତି ଗ୍ରାମରୁ ପାଣ୍ଠି ସଂଗ୍ରହ କରିବେ। ମେ ମାସରେ ଆନ୍ଦୋଳନ କରାଯିବ। ଏହା ପୂର୍ବରୁ ରାଜ୍ୟ କମିଟି ନିକଟରେ ୨ କୋଟି ଟଙ୍କା ଜମା କରିବାକୁ ପ୍ରସ୍ତାବ ରଖିଛନ୍ତି। ପ୍ରତ୍ୟେକ ଦିନ ୧୦୦ ବ୍ଲକରେ ୧୦୦ଜଣ କର୍ମକର୍ତ୍ତା ଏହି କାମ କରିବା ପାଇଁ ସେ ଆହ୍ବାନ ଜଣାଇଛନ୍ତି। ସେହିପରି ରାଜ୍ୟ ସଂଯୋଜକ ରଶ୍ମିରଞ୍ଜନ ସ୍ବାଇଁ ପ୍ରସ୍ତାବ ରଖି କହିଛନ୍ତି, ଧାନ ସଂଗ୍ରହ କରିବାରେ କଟକଣା ନ କରି ସମସ୍ତ ବଳକା ଧାନ ସଂଗ୍ରହ କରିବାକୁ ଦାବି କରିଛନ୍ତି। ଅକ୍ଷୟ କୁମାର କହିଛନ୍ତି, ମେ ମାସ ସୁଦ୍ଧା ରାଜ୍ୟ ସରକାରଙ୍କ ବିରୋଧରେ ନିର୍ଣ୍ଣାୟକ ଆନ୍ଦୋଳନ କରାଯିବ। ବିଭିନ୍ନ ସମୟରେ ଚାଷୀଙ୍କ ଲାଗି ମିଥ୍ୟା ଘୋଷଣା କରାଯାଉଛି। ଆସନ୍ତା ଦିନରେ ହେବାକୁ ଥିବା ଆନ୍ଦୋଳନରେ ଅତି କମ୍ରେ ୫ଲକ୍ଷ ଚାଷୀ ଅହିଂସାତ୍ମକ ଆନ୍ଦୋଳନରେ ଯୋଗଦେବେ ବୋଲି ସେ କହିଛନ୍ତି। ସରକାରଙ୍କ ଏହି ମିଥ୍ୟା ପ୍ରତିଶ୍ରୁତି ବିରୋଧରେ ଅକ୍ଷୟ ଅନଶନ କରିବେ ବୋଲି କହିଛନ୍ତି।