ନୂଆଦିଲ୍ଳୀ, ୧୪।୪(ପି.ଟି.)- କରୋନା ଭାଇରସ ବିରୋଧରେ ଲଢେଇ ପାଇଁ ସାରା ଦେଶରେ ଚାଲିଥିବା ଲକ୍ଡାଉନ୍ର ସମୟସୀମାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମେ ୩ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏହାର ପ୍ରଭାବ କ୍ରୀଡ଼ା ଉପରେ ପଡିଛି। ସ୍ପୋଟର୍ସ ଅଥରିଟୀ ଅଫ୍ ଇଣ୍ଡିଆ (ସାଇ) ମଧ୍ୟ ତା’ର ସବୁ ପ୍ରକାର ଟ୍ରେନିଂ କ୍ୟାମ୍ପକୁ ମେ ୩ ତାରିଖର ପର୍ଯ୍ୟନ୍ତ ବାତିଲ କରିଛି। ଅର୍ଥାତ୍ ଦେଶବ୍ୟାପୀ ସାଇ ସେଣ୍ଟରଗୁଡିକରେ ଆୟୋଜନ ହେବାକୁଥିବା ସବୁ ପ୍ରକାର ଟ୍ରେନିଂ କ୍ୟାମ୍ପ ସସ୍ପେଣ୍ଡ ହୋଇଛି। କୋଭିଡ୍-୧୯ ସାରା ଦେଶ ତଥା ବିଶ୍ୱରେ ମହାମାରୀର ରୂପ ନେଇଥିବାରୁ ଏପରି ନିଷ୍ପତ୍ତି ନିଆଯାଇଛି।
ପୂର୍ବରୁ ୧୪ ତାରିଖ ପର୍ଯ୍ୟନ୍ତ ଲକ୍ଡାଉନ୍ ଚାଲୁ ରହିବାର ଥିଲା ଓ ଏହି ତାରିଖ ପର୍ଯ୍ୟନ୍ତ ସବୁ କ୍ୟାମ୍ପକୁ ବାତିଲ କରାଯାଇଥିଲା। ତେବେ ଲକ୍ଡାଉନ୍ର ସମୟସୀମାକୁ ବୃଦ୍ଧି କରାଯାଇଥିବାରୁ ଏହାକୁ ମେ ୩ ତାରିଖ ପର୍ଯ୍ୟନ୍ତ ବଢାଇବାକୁ ହେଲା ବୋଲି ସାଇ ପକ୍ଷରୁ କୁହାଯାଇଛି। ଜାଭେଲିନ୍ ତାରକା ନୀରଜ ଚୋପ୍ରାଙ୍କ ଭଳି ଆଥ୍ଲେଟ ପଟିଆଲାସ୍ଥିତ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ସ୍ପୋଟର୍ସ (ଏନ୍ଆଇଏସ୍)ରେ ରହୁଛନ୍ତି। ତାଙ୍କୁ ଏବେ ସାଇ ହଷ୍ଟେଲରେ ରହିବାକୁ ଦିଆଯିବ। ଗତମାସ ଚୋପ୍ରା ତୁର୍କୀରୁ ଟ୍ରେନିଂ ସାରି ସ୍ବଦେଶ ପ୍ରତ୍ୟାବର୍ତ୍ତନ କରିଥିଲେ ଓ ସେବେଠାରୁ ସେ ପଟିଆଲାରେ ରହି ଆସୁଛନ୍ତି। ପୁଣି ଯେଉଁ ଆଥ୍ଲେଟମାନେ ସାଇ ବେଙ୍ଗାଲୁରୁରେ ଓ ପଟିଆଲାରେ ରହୁଛନ୍ତି ସେମାନେ ସେହିଠାରେ ରହିବେ। ଏହି ମହାମାରୀରେ ଭାରତରେ ୧୦,୦୦୦ ଲୋକ ସଂକ୍ରମିତ ହୋଇଥିବା ବେଳେ ୩୦୦ ଲୋକ ମୃତ୍ୟୁବରଣ କଲେଣି।