ମୁମ୍ବାଇ,୨୮।୧୨: ମୁମ୍ବାଇର ୧୮ ବର୍ଷୀୟା ଫୁଟବଳ ଖେଳାଳି ମେରି ନାଇଡୁ ୨୦୧୭ରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ପୁରସ୍କୃତ ହୋଇଥିଲେ। ମାତ୍ର ୨ ବର୍ଷ ଭିତରେ ସେ ଏବେ ଅଲୋଡା ହୋଇଯାଇଛନ୍ତି। ମେରି ଏବେ ତାଙ୍କ ପରିବାର ସହ ଫୁଟ୍ପାଥରେ ଦିନ କାଟୁଥିବା କହିଛନ୍ତି। ସୂଚନାଯୋଗ୍ୟ, ପୂର୍ବରୁ ସେ ଏକ କଂକ୍ରିଟ ଘରେ ରହୁଥିବା ବେଳେ ମହାନଗର ପାଳିକା ପକ୍ଷରୁ ତାକୁ ଭାଙ୍ଗି ଦିଆଯାଇଥିଲା। ତା’ପରଠାରୁ ସେ ତାଙ୍କ ମାତାପିତା ଓ ୨ ଭଉଣୀଙ୍କ ସହ ମିଶି ଫୁଟ୍ପାଥରେ ରହୁଥିବା ପ୍ରକାଶ କରିଛନ୍ତି। ମୋଦିଙ୍କଠାରୁ ପୁରସ୍କୃତ ହେବା ପରେ ତାଙ୍କୁ ସବୁ ପ୍ରକାର ସହାୟତା ଯୋଗାଇ ଦେବାକୁ କଥା ହୋଇଥିଲା। ହେଲେ ଏପର୍ଯ୍ୟନ୍ତ ତାଙ୍କୁ କୌଣସି ସହାୟତା ମିଳି ପାରି ନାହିଁ। ଫଳରେ ସେ ଅଧାରୁ ପାଠପଢା ଛାଡିଥିବା ବେଳେ ଖେଳିବାକୁ ମଧ୍ୟ ସେମତି କିଛି ପ୍ରୋତ୍ସାହନ ମିଳିପାରୁ ନାହିଁ। କିନ୍ତୁ ଭବିଷ୍ୟତରେ ସେ ଭାରତ ପକ୍ଷରୁ ଫୁଟବଲ ଖେଳିବେ ବୋଲି ଆଶା ରଖିଥିବା କହିଛନ୍ତି।