ଇସ୍ଲାମାବାଦ,୩୦।୮: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ ଭାରତ ବିରୋଧି ଅନେକ ପଦକ୍ଷେପ ନେଉଥିବା ବେଳେ ଶୁକ୍ରବାର ଇମ୍ରାନଙ୍କ ସରକାର ଘୋଷଣା କରିଥିଲେ ‘କଶ୍ମୀର ଆଓ୍ବାର’। ଅର୍ଥାତ୍ ଦିନ ୧୨ଟାରୁ ୧୨ଟା ୩୦ ମିନିଟ୍ ପର୍ଯ୍ୟନ୍ତ ପାକିସ୍ତାନର ସମସ୍ତ କାର୍ଯ୍ୟାଳୟ, ହସ୍ପିଟାଲ ଏମିତିକି ଯାତାୟତ ସବୁକିଛି ବନ୍ଦ ରହିବ। ତାହାହିଁ ହେଲା। କିଛି ସମୟ ପାଇଁ ସବୁକିଛି ହୋଇଗଲା ଠପ୍। ହେଲେ ଧୁଧୁ ଖରାରେ ରାସ୍ତାରେ ଅଟକି ଥିବା କେତେଜଣ ବ୍ୟକ୍ତି ଏହାକୁ ନେଇ ପ୍ରତିକ୍ରିୟା ରଖିଛନ୍ତି। ସେମାନେ କହିଛନ୍ତି ଏମିତି ବନ୍ଦ ଫଳରେ ପାକିସ୍ତାନକୁ କି ଲାଭ ମିଳିଲା ବୋଲି ସରକାର ଯଦି ଏହାର ଉତ୍ତର ରଖନ୍ତି ତେବେ ଖୁସି ଲାଗିବ। ଏଥିରେ କେବଳ ସାଧାରଣ ଜନତା ହନ୍ତସନ୍ତ ହେଲା ସିନା ହେଲେ ଫଳ ଶୂନ୍ୟ ବୋଲି ସେମାନେ ମତ ଦେଇଛନ୍ତି। ଅନ୍ୟ କେତେଜଣ କହିଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାକିସ୍ତାନ ଆକାଶ ପଥ ଦେଇ ଉଡିଯାଉଛନ୍ତି ତାଙ୍କୁ ତ ପାକିସ୍ତାନ ଅଟକାଇ ପାରୁନି ଆମକୁ ଅଟକାଇ ଲାଭ କ’ଣ। ସୂଚନାଯୋଗ୍ୟ, ମୋଦି ନିକଟରେ ଫ୍ରାନ୍ସ ଗସ୍ତ କରିଥିବା ବେଳେ ସେ ପାକିସ୍ତାନ ଆକାଶ ପଥ ଦେଇ ଯାତ୍ରା କରିଥିଲେ। ଆଉ ଏହା ପରେ ପାକିସ୍ତାନ ମନ୍ତ୍ରୀ ଭାରତ ପାଇଁ ତା’ର ଆକାଶ ପଥ ବନ୍ଦ କରିବାକୁ ଧମକ ଦେଇଥିଲେ। ଜମ୍ମୁ-କଶ୍ମୀରରେ ଅନୁଚ୍ଛେଦ ୩୭୦ ଉଚ୍ଛେଦ ପରେ ଏବେ ପାକିସ୍ତାନ ସରକାର ଭାରତ ବିରୋଧି ନୂଆ ନୂଆ ପଦକ୍ଷେପ ନେଇ ଚାଲିଛି। ଆଉ ଶୁକ୍ରବାର ପାଳନ କରାଯାଇଥିବା ‘କଶ୍ମୀର ଆଓ୍ବାର’ ସମ୍ପୂର୍ଣ୍ଣ ଫ୍ଲପ୍ ହୋଇଛି ବୋଲି କହିଛନ୍ତି ପାକିସ୍ତାନ ସାଧାରଣ ଜନତା।