ନୂଆଦିଲ୍ଲୀ,୧୧।୮: ତିନ୍ ତଲାକକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାର ଯେଉଁ ନିଷ୍ପତ୍ତି ନେଲେ ସେଥିରେ ଉତ୍ସାହିତ ହୋଇ ବାରଣାସୀର ମୁସଲମାନ ମହିଳାମାନେ ମୋଦିଙ୍କ ନିକଟକୁ ନିଜ ହାତ ତିଆରି ରାକ୍ଷୀ ପଠାଇଛନ୍ତି। ଏହାକୁ କେତେଜଣ ମୁସଲମାନ ମୌଲବି ପ୍ରଶଂସା କରିଥିବା ବେଳେ ଆଉ କେତେଜଣ ଏହା ଶସ୍ତା ପ୍ରଚାର ବୋଲି କହିଛନ୍ତି। ତେବେ ମହିଳାମାନଙ୍କର ଯୁକ୍ତି ହେଉଛି ତିନ୍ ତଲାକ୍ ଭଳି କୁପ୍ରଥାକୁ ମୋଦି ଯେଉଁଭଳି ଭାବେ ହଟାଇ ଦେଇଛନ୍ତି ତାହା କେବଳ ଜଣେ ଭଉଣୀ ପାଇଁ ଭାଇ ହିଁ କରିପାରିବ। ତେଣୁ ତାଙ୍କୁ ଭାଇ ବୋଲି ସମ୍ବୋଧନ କରି ମୁସଲମାନ ମହିଳାମାନେ ନିଜ ହାତରେ ମୋଦିଙ୍କ ଫଟୋ ଲଗାଇ ରାକ୍ଷୀ ତିଆରି କରିବା ସହ ଏହାକୁ ତାଙ୍କ ନିକଟକୁ ପଠାଇଛନ୍ତି। ସେମାନଙ୍କ ମତ ହେଲା ମୋଦି ଆମର ଦୟନୀୟ ସ୍ଥିତି ଉପରେ ପୂର୍ଣ୍ଣଚ୍ଛେଦ ପକାଇଛନ୍ତି। ତେଣୁ ସେ କେବଳ ଆମର ନୁହେଁ ଦେଶର ସବୁ ମୁସଲମାନ ମହିଳାଙ୍କର ବଡ ଭାଇ। ଗୁରୁବାର ରାକ୍ଷୀ ପୂର୍ଣ୍ଣିମା ଥିବାରୁ ଏହା ପୂର୍ବରୁ ମହିଳାମାନେ ରାକ୍ଷୀ ପଠାଇବା ଆରମ୍ଭ କରିଛନ୍ତି। ସୂଚନାଯୋଗ୍ୟ, ମୋଦି ବାରଣାସୀର ଏମ୍ପି ଭାବେ ଚଳିତ ଲୋକ ସଭା ନିବାଚନରେ ବିଜୟ ଲାଭ କରିଛନ୍ତି।