ବାଲାପୁର,୭।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୩ବର୍ଷ ପୂର୍ବରୁ ଯେଉଁ କୃଷକଙ୍କୁ ପ୍ରଶଂସା କରିଥିଲେ ସେ ସୋମବାର ବିଷ ପିଇ ଆତ୍ମହତ୍ୟା ଉଦ୍ୟମ କରିଛନ୍ତି। ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଅକୋଲାର ଏକ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନାଯୋଗ୍ୟ, ବାଲାପୁର ତହସିଲର ସୋଲାଡ ଗଁ।ର ମୁରଲୀଧର ରାଉତ(୪୨)ଙ୍କ ହାଇଓ୍ବେ ଉପରେ ଏକ ହୋଟେଲ ରହିଥିଲା। ତେବେ ରାଜମାର୍ଗକୁ ପ୍ରଶସ୍ତ କରିବା ପାଇଁ ତାଙ୍କର ଜମିକୁ ଅଧିଗ୍ରହଣ କରାଯାଇଥିଲା। ତେବେ ସଡ଼କ ପରିଯୋଜନାରେ ଅଧିଗ୍ରହଣ ହୋଇଥିବା ଜମିର କ୍ଷତିପୂରଣ ଦେବାରେ ବିଳମ୍ବ ହେବାରୁ ମୂରଲୀଧରଙ୍କ ସହ ଅନ୍ୟ ୪ଜଣ କୃଷକ ଅକୋଲାରେ ଥିବା ଜିଲାଧିକାରୀଙ୍କ କାର୍ଯ୍ୟାଳୟକୁ ଯାଇଥିଲେ। ସେଠାରେ ଅତିରିକ୍ତ ଜିଲାଧିକାରୀଙ୍କ ସମ୍ମୁଖରେ ୫ଜଣ କୃଷକ ବିଷ ପିଇ ଦେଇଥିଲେ। ଏହାପରେ ତାଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ହସ୍ପିଟାଲକୁ ନିଆଯାଇ ଚିକିତ୍ସା କରାଯାଇଛି। ଏବେ ସେମାନଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ଜଣାପଡ଼ିଛି। ଅନ୍ୟପଟେ ୨୦୧୬ରେ ବିମୁଦ୍ରିକରଣ ସମୟରେ ପୁରୁଣା ୫ଶହ ବା ହଜାରେ ଟଙ୍କା ନେଇ ଆସୁଥିବା ଯାତ୍ରୀଙ୍କୁ ମୂରଲୀଧର ମାଗଣାରେ ଖାଦ୍ୟ ଖୁଆଇବା ସହ ପରେ ଟଙ୍କା ଦେବ ବୋଲି କହିଥିଲେ। ସେହି ସମୟରେ ତାଙ୍କର ଏହି ମହାନ୍ କାର୍ଯ୍ୟ ପାଇଁ ମନ୍ କି ବାତ୍ରେ ମୋଦି ତାଙ୍କୁ ବହୁ ପ୍ରଶଂସା କରିଥିଲେ।
