ନୂଆଦିଲ୍ଲୀ,୨୮।୫: ଲୋକ ସଭା ନିର୍ବାଚନରେ ବିପୁଳ ବିଜୟ ପରେ ଏବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦ୍ୱିତୀୟ ଥର ଲାଗି ଦେଶର ଶାସନ ଭାର ନେବାକୁ ଯାଉଛନ୍ତି। ଆସନ୍ତା ୩୦ରେ ମୋଦି ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବେ। ଏହି ଉତ୍ସବରେ ଯୋଗ ଦେବାକୁ ବିଦେଶରୁ ପ୍ରାୟ ୮ଟି ଦେଶର ନେତାଙ୍କୁ ନିମନ୍ତ୍ରଣ ମିଳିଛି। ହେଲେ ଗୁରୁତ୍ୱପୂର୍ଣ୍ଣ କଥା ହେଲା ଭାରତର ପଡୋଶୀ ଦେଶ ପାକିସ୍ତାନର କୌଣସି ନେତାଙ୍କୁ ଏହି ଉତ୍ସବରେ ଯୋଗ ଦେବାକୁ ନିମନ୍ତ୍ରଣ କରାଯାଇ ନାହିଁ। ସବୁବେଳେ ବନ୍ଧୁତାର ହାତ ବଢାଇଥିବା ଭାରତକୁ ପାକିସ୍ତାନ ଯେଭଳି ଧୋକା ଦେଇ ଚାଲିଛି ତାକୁ ନଜରରେ ରଖି ହୁଏତ ପାକିସ୍ତାନକୁ ଏହି ଉତ୍ସବକୁ ନିମନ୍ତ୍ରଣ ମିଳି ନ ଥିବା ଆଲୋଚନା ହେଉଛି। ତେବେ ଏଥିରେ ଯୋଗଦେବା ଲାଗି ଭୂଟାନ, ଶ୍ରୀଲଙ୍କା, ଥାଇଲାଣ୍ଡ, ମ୍ୟାନମାର, ନେପାଳ ଓ ବାଂଲାଦେଶର ନେତାମାନଙ୍କୁ ନିମନ୍ତ୍ରଣ କରାଯାଇଛି। ସେହିଭଳି କିର୍ଗିସ୍ତାନର ରାଷ୍ଟ୍ରପତି ଓ ମରିଶସର ପ୍ରଧାନମନ୍ତ୍ରୀଙ୍କୁ ମଧ୍ୟ ଏଥିଲାଗି ନିମନ୍ତ୍ରଣ କରାଯାଇଛି।