ନୂଆଦିଲ୍ଲୀ,୨୧ା୮(ପି.ଟି.): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ତାଙ୍କର ବ୍ରିଟିଶ ପ୍ରତିପକ୍ଷ ବୋରିସ୍ ଜନ୍ସନଙ୍କ ସହ ଟେଲିଫୋନ୍ରେ କଥା ହୋଇଛନ୍ତି। ଏହି ଅବସରରେ ସେ ବ୍ରିଟେନରେ ଥିତ୍ବା ଭାରତୀୟ ଉଚ୍ଚାୟୁକ୍ତଙ୍କ କାର୍ଯ୍ୟାଳୟ ଭଙ୍ଗାରୁଜା ପ୍ରସଙ୍ଗ ଜନ୍ସନଙ୍କ ଦୃଷ୍ଟିକୁ ଆଣିଥିଲେ। ଅଗଷ୍ଟ ୧୫ରେ କିଛି ପାକିସ୍ତାନୀ ଉକ୍ତ କାର୍ଯ୍ୟାଳୟରେ ପଶି ଭଙ୍ଗାରୁଜା କରିଥିଲେ। ଏହି ଘଟଣା ପାଇଁ ବ୍ରିଟିଶ ପ୍ରଧାନମନ୍ତ୍ରୀ ଦୁଃଖପ୍ରକାଶ କରିବା ସହ ଭାରତୀୟ ମିଶନର ସୁରକ୍ଷା ପାଇଁ ସମସ୍ତ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି।
୭୩ତମ ସ୍ବାଧୀନତା ଦିବସ ପାଳନ ଲାଗି ଭାରତୀୟ ତଥା ଭାରତୀୟ ବଂଶୋଦ୍ଭବମାନେ ଲଣ୍ଡନସ୍ଥିତ ଉଚ୍ଚାୟୁକ୍ତ କାର୍ଯ୍ୟାଳୟ ବାହାରେ ଛିଡ଼ାହୋଇଥିବାବେଳେ ବିଚ୍ଛିନ୍ନତାବାଦୀ ଶିଖ୍ଙ୍କ ସମେତ ପାକିସ୍ତାନ ପ୍ରାୟୋଜିତ ବିକ୍ଷୋଭକାରୀ ସେମାନଙ୍କ ଉପରକୁ ଅଣ୍ଡା ଓ ପାଣି ବୋତଲ ମାଡ଼ କରିଥିଲେ। ଉଚ୍ଚାୟୁକ୍ତ କାର୍ଯ୍ୟାଳୟ ଉପରକୁ ସେମାନେ ଢ଼େଲା ଫିଙ୍ଗିବା ସହ ତ୍ରିରଙ୍ଗାକୁ ନଷ୍ଟ କରିଦେଇଥିଲେ। ସେମାନେ ଅନୁଚ୍ଛେଦ ୩୭୦ ଉଚ୍ଛେଦ ବିରୋଧରେ ବିକ୍ଷୋଭ ପ୍ରଦର୍ଶନ କରିଥିଲେ। ଭାରତ, ୟୁରୋପ ସମେତ ସମଗ୍ର ବିଶ୍ୱ ଆତଙ୍କବାଦ ଜନିତ ବିପଦର ସମ୍ମୁଖୀନ। ଉଗ୍ରବାଦ, ହିଂସା, ଅସହିଷ୍ଣୁତା ବିରୋଧରେ ପ୍ରଭାବଶାଳୀ ପଦକ୍ଷେପ ଗ୍ରହଣ କରିବା ଉପରେ ପ୍ରଧାନମନ୍ତ୍ରୀ ମୋଦି ଗୁରୁତ୍ୱାରୋପ କରିଥିଲେ। ଆଇଏସ୍ ଭଳି ଆତଙ୍କବାଦୀ ସଂଗଠନଗୁଡିକ କାୟା ବିସ୍ତାର କରୁଥିବା ସମ୍ପର୍କରେ ସେ ଜନ୍ସନଙ୍କୁ ଜଣାଇଥିଲେ।