ନୂଆଦିଲ୍ଲୀ,୨୫।୧୨: ସିଏଏ, ଏନ୍ଆର୍ସି ଏବଂ ଏନ୍ପିଆର୍ ନେଇ କଂଗ୍ରେସ ଭାଜପା କୁ ଘେରିବାରେ ଲାଗିଛି। ଏହି ମର୍ମରେ ବରିଷ୍ଠ କଂଗ୍ରେସ ନେତା ଅଭିଷେକ ମନୁ ସିଙ୍ଘଓ୍ବୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ କଡ଼ା ସମାଲୋଚନା କରିଛନ୍ତି। ସେ ଟୁଇଟ୍ କରି କହିଛନ୍ତି, ମୋଦି-ଶାହ ଏସବୁ ପ୍ରସଙ୍ଗରେ ଜଣେ ଜଣେ ଆଇନଜୀବୀ ଭଳି କଥା କହୁଛନ୍ତି। ସେମାନେ ଏଭଳି କଥା କହିବା ବନ୍ଦ କରନ୍ତୁ ବୋଲି ସେ କହିଛନ୍ତି। ମୋଦି ଏନ୍ଆର୍ସି ସମ୍ପର୍କରେ ସଂସଦ ଅବା କ୍ୟାବିନେଟ୍ରେ ଆଲୋଚନା ହୋଇ ନ ଥିବା କହିଥିବାବେଳେ ଏବେ ଶାହ ଏହାକୁ ସମଗ୍ର ଦେଶରେ ଲାଗୁ କରାଯିବ ବୋଲି କହୁଛନ୍ତି। ଦେଶର ବହୁ ରାଜ୍ୟ ଏନ୍ଆର୍ସି ଲାଗୁ କରିବାକୁ ଅମଙ୍ଗ ହେଉଛନ୍ତି। ସେସବୁ ରାଜ୍ୟ ମଧ୍ୟରେ ରାଜସ୍ଥାନ, ବିହାର, ପଶ୍ଚିମବଙ୍ଗ, କେରଳ, ଦିଲ୍ଲୀ, ମଧ୍ୟପ୍ରଦେଶ, ଛତିଶଗଡ଼, ଆସାମ, ତେଲଙ୍ଗାନା ଏବଂ ଉତ୍ତରପୂର୍ବ ରାଜ୍ୟ ସାମିଲ୍ ଅଛନ୍ତି। ସେହିପରି କଂଗ୍ରେସ ସମେତ ଭାଜପାର ବହୁ ସହଯୋଗୀ ଦଳ ମଧ୍ୟ ଏଥିପାଇଁ ସହମତ ହେଉ ନ ଥିବା ସେ ଟୁଇଟ୍ କରିଛନ୍ତି।
