ଭୁବନେଶ୍ୱର, ୪।୬(ବ୍ୟୁରୋ): ବାରିପଦାସ୍ଥିତ ଏମ୍ପିସି ସ୍ବୟଂଶାସିତ ମହାବିଦ୍ୟାଳୟରେ ମୋବାଇଲ ଫୋନ୍ ଟର୍ଚ୍ଚ ଲାଇଟ୍ରେ ଯୁକ୍ତ୨ ଖାତାଦେଖା ଘଟଣା ମିଛ। ସେହି ଘଟଣାକୁ ଯୋଜନାବଦ୍ଧ ଭାବେ ତିଆରି କରାଯାଇଥିଲା ବୋଲି ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ) ଅଧ୍ୟକ୍ଷ ଅମରେନ୍ଦ୍ର ପଟ୍ଟନାୟକ ସୋମବାର କହିଛନ୍ତି। ସେ କହିଛନ୍ତି ଯେ, ଉକ୍ତ କେନ୍ଦ୍ରରେ ଅଫ୍ଲାଇନ୍ ଖାତା ଦେଖା ଚାଲିଥିଲା। ସେହି ମୂଲ୍ୟାୟନ କେନ୍ଦ୍ରଟି ଇଲେକ୍ସନ ପାଇଁ ଷ୍ଟ୍ରଙ୍ଗ୍ରୁମ୍ ହେବାରୁ ଖାତା ଦେଖାକୁ ଅନ୍ୟ କୋଠାକୁ ସିଫ୍ଟ କରାଯାଇଥିଲା। ଯେଉଁଠିକୁ ସିଫ୍ଟ କରାଗଲା ସେଠାରେ ଲାଇଟ୍ରେ ଖାତା ଦେଖିବା ପାଇଁ ଡିଜି ସେଟ୍ ମଧ୍ୟ ରହିଥିଲା। ଯେଉଁଦିନ ମୋବାଇଲ୍ ଟର୍ଚ୍ଚ ଲାଇଟ୍ରେ ଖାତା ଦେଖିବା କଥା ଉଠିଥିଲା ସେଦିନ ଯେତିକି ଖାତା ଦେଖାଯିବା କଥା ତାହା ସରିଯାଇଥିଲା। ହେଲେ ପରେ ଏକ ନିର୍ଦ୍ଧିଷ୍ଟ ଗଣମାଧ୍ୟମକୁ ଡକାଇ ଏକ ମିଛ ରୂପ ଦିଆଯାଇଥିଲା। କେତେଜଣ ଅଧ୍ୟାପକଙ୍କ ଆକ୍ରୋଶ ମନୋଭାବ ରଖି ଏଭଳି କରାଇଥିଲେ ବୋଲି ପରିଷଦ ଅଧ୍ୟକ୍ଷ କହିଛନ୍ତି। ତେବେ ବର୍ତ୍ତମାନ ପର୍ଯ୍ୟନ୍ତ ଅନେକ କେନ୍ଦ୍ରରେ ଖାତା ଦେଖା ଚାଲିଛି। ଯେଉଁ କେନ୍ଦ୍ରରେ ଟର୍ଚ୍ଚ ଲାଇଟ୍ରେ ଖାତା ଦେଖାଯାଉଥିବା କଥା ସାମ୍ନାକୁ ଆସିଥିଲା ସେହି କେନ୍ଦ୍ରରେ ତା’ ପରଦିନ ହିଁ ମୂଲ୍ୟାୟନ ଶେଷ ହେଲା। ତେଣୁ ତରବରିଆ ଭାବେ ଟର୍ଚ୍ଚ ଲାଇଟ୍ରେ ଖାତା ଦେଖିବାର କିଛି ଆବଶ୍ୟକତା ନ ଥିଲା। ଅନ୍ୟପକ୍ଷରେ ସେଠାକୁ ମୋବାଇଲ ନେବା ପାଇଁ ମଧ୍ୟ ବାରଣ ଥିଲା। ତେଣୁ କିପରି ମୋବାଇଲ୍ ଟର୍ଚ୍ଚ ଲାଇଟ୍ରେ ଖାତା ଦେଖାଗଲା ଓ ଏହି ଘଟଣାର ଭିଡିଓ ରେକର୍ଡିଂ କରାଗଲା ତାହା ନିଶ୍ଚିତ ପ୍ରଶ୍ନବାଚୀ। ଏସବୁ ଜାଣିଶୁଣି କରାଯାଇଛି। ତେବେ ଉକ୍ତ ଘଟଣାର ତଦନ୍ତ ରିପୋର୍ଟ ମିଳିଛି। ଯେଉଁ ଅଧ୍ୟାପକମାନେ ଏହି ଘଟଣା ଲିପ୍ତ ରହିଛନ୍ତି ତା’ର ଅନୁଧ୍ୟାନ ଚାଲିଛି। ଆଉ କିଛି ତଥ୍ୟର ଆବଶ୍ୟକତା ରହିଛି। ସେସବୁ ମିଳିଗଲା ପରେ ଯୋଜନା କରିଥିବା ଅଧ୍ୟାପକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଧ୍ୟକ୍ଷ ଅମରେନ୍ଦ୍ର ପଟ୍ଟନାୟକ କହିଛନ୍ତି।
ଅନ୍ୟପକ୍ଷରେ ସିଏଚ୍ଏସ୍ଇ ଅଧ୍ୟକ୍ଷଙ୍କ ଏହି ମନ୍ତବ୍ୟକୁ ଦୁର୍ଭାଗ୍ୟଜନକ ବୋଲି କହିଛନ୍ତି ଓଡ଼ିଶା ସ୍କୁଲ କଲେଜ କର୍ମଚାରୀ ମିଳିତ ସଂଘର ଆବାହକ ଗୋଲକ ନାୟକ। ସେ କହିଛନ୍ତି, ପରୀକ୍ଷାରେ ସିସି କ୍ୟାମେରା ଲଗାଯିବ ବୋଲି ମାସେ ପୂର୍ବରୁ କୁହାଗଲା। ତେଣୁ ଛାତ୍ରୀଛାତ୍ରମାନେ ଭୟରେ ପରୀକ୍ଷା ଦେଲେ। ସେହିପରି ଶିକ୍ଷକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଧମକ ପାଇବା ପରେ ଶିକ୍ଷକମାନେ ଭୟରେ ଖାତା ଦେଖିଲେ। ତେଣୁ ଏସବୁକୁ ଚତୁରତାର ସହ ଏଡ଼ାଇଦେବା ପାଇଁ ଓ ସରକାର ନିଜ ସ୍ଥିତିକୁ ବଜାୟ ରଖିବା ପାଇଁ ଏଭଳି ମନ୍ତବ୍ୟ ଦେଉଛନ୍ତି ବୋଲି ସେ କହିଛନ୍ତି।