ନୂଆଦିଲ୍ଲୀ,୩୦। ୩: ସବୁ ପ୍ରକାରର ମିଆଦୀ ଋଣ ଉପରେ ଇଏମ୍ଆଇ ପ୍ରଦାନ କ୍ଷେତ୍ରରେ ସରକାର ୩ ମାସର ଆଶ୍ୱସ୍ତି ଦେଇଛନ୍ତି। ମାତ୍ର ଏହାକୁ ଲାଗୁ କରାଇବା ଏବଂ ଡକ୍ୟୁମେଣ୍ଟେଶନ କ୍ଷେତ୍ରରେ ଅସୁବିଧା ସ୍ଥିତି ଉପୁଯିବ ବୋଲି ଶିଳ୍ପ ପକ୍ଷରୁ ପ୍ରାରମ୍ଭିକ ପ୍ରତିକ୍ରିୟାରେ କୁହାଯାଇଛି। ଏ କ୍ଷେତ୍ରରେ ପରିଚାଳନାଗତ ଚ୍ୟାଲେଞ୍ଜ ଏବଂ ପେପରଓ୍ବାର୍କରେ ସମସ୍ୟା ଉପୁଜିପାରେ ବୋଲି ଆଶଙ୍କା କରାଯାଉଛି। ଏବେ ସାରା ଦେଶରେ ଲକ୍ଡାଉନ ଘୋଷଣା କରାଯାଇଥିବାରୁ କେତେକ ସାଧାରଣ ଧାରାକୁ ଲାଗୁ କରାଇବା ନେଇ ମଧ୍ୟ ସମସ୍ୟା ଉପୁଜୁଛି। ଏବେ ଶାଖାଗୁଡିକରେ କମ୍ ସଂଖ୍ୟକ କର୍ମଚାରୀ ରଖାଯିବା ସହ ଅତି ଦରକାରୀ କାମ କେବଳ ହେଉଛି। ସେହିଭଳି କଲ୍ ସେଣ୍ଟରଗୁଡିକରେ କମ୍ ସଂଖ୍ୟକ କର୍ମଚାରୀ କାମ କରୁଛନ୍ତି। ଗ୍ରାହକଙ୍କୁ ଇ-ମେଲ ଏବଂ ଏସ୍ଏମ୍ଏସ୍ ପଠାଯାଉଥିବା ବ୍ୟାଙ୍କଗୁଡିକ କହିଛନ୍ତି।
ମେସେଜ ଏବଂ ଇ-ମେଲ କେତେ ସଂଖ୍ୟକ ଗ୍ରାହକଙ୍କ ନିକଟରେ ପହଞ୍ଚିପାରିଲା ତାହା ମୋରାଟୋରିୟମର ସଫଳତା ନିର୍ଭର କରେ। କାହାକୁ ମୋରାଟୋରିମରେ ସାମିଲ କରାଯିବ କାହାକୁ ନାହିଁ ତାହା ଖୁବ୍ କମ୍ ସମୟରେ ବିଚାର କରିବା କଷ୍ଟକର। ଏବେ କମ୍ କର୍ମଚାରୀ କାମ କରୁଥିବାରୁ ସବୁ କର୍ମଚାରୀଙ୍କୁ ମୋରାଟୋରିୟମ ଭିତରେ ନେଇପାରନ୍ତି ବୋଲି ଅନୁମାନ କରାଯାଉଛି। ଏହି ଦିଗ ଉପରେ ଘରୋଇ ବ୍ୟାଙ୍କଗୁଡିକ ବିଚାର କରୁଛନ୍ତି। ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର ଅଧ୍ୟକ୍ଷ ରଜନୀଶ କୁମାର କହିଛନ୍ତି ଯେ, ସିଧାସଳଖ ଭାବେ ସବୁ ଗ୍ରାହକଙ୍କୁ ମୋରାଟୋରିୟମରେ ସାମିଲ କରାଯିବ। ଏସ୍ବିଆଇ ନିଷ୍ପତ୍ତି ଉପରେ ସବୁ ବ୍ୟାଙ୍କ ଆଗକୁ ବଢିବେ ବୋଲି ଅନ୍ୟ ଜଣେ ବ୍ୟାଙ୍କର ଏମ୍ଡି କହିଛନ୍ତି। ଏହି ପ୍ରସଙ୍ଗ ଉପରେ ବର୍ତ୍ତମାନ ବିଚାର କରାଯାଉଛି ବୋଲି ଏକ ପ୍ରମୁଖ ଘରୋଇ ବ୍ୟାଙ୍କର ରିଟେଲ ବ୍ୟାଙ୍କିଙ୍ଗ ମୁଖ୍ୟ କହିଛନ୍ତି। ସରକାରଙ୍କ ଏଭଳି ନିଷ୍ପତ୍ତି ସତ୍ତ୍ୱେ ଏମିତି କିଛି ଗ୍ରାହକ ରହିଛନ୍ତି ଯେଉଁମାନେ ମୋରାଟୋରିୟର ସୁବିଧା ନେବାକୁ ଚାହଁୁନାହାନ୍ତି। କାରଣ କେବଳ ଋଣ କିସ୍ତି ଦେବା କିଛି ସମୟ ବନ୍ଦ ହୋଇଛି। ସୁଧରେ କୋହଳ କରାଯାଇ ନାହିଁ। ସୁଧହାର ସମାନ ଥିବାରୁ କିଛି ଗ୍ରାହକ ସେମାନଙ୍କ ବକେୟା ରାଶି ପଇଠ ପୂର୍ବବତ୍ ଧାରାରେ କରିବାକୁ ଚାହଁୁଥିବା ଜଣାପଡିଛି।