ହାତୀଓଟ,୧୯ା୧୦-ସରକାର ଗ୍ରାମାଞ୍ଚଳର ବିକାଶ ପାଇଁ ଅନେକ ଯୋଜନା ପ୍ରଣୟନ କରିଛନ୍ତି। ଏଥିପାଇଁ ବହୁ ଟଙ୍କା ମଧ୍ୟ ଖର୍ଚ୍ଚ ହେଉଛି। କିନ୍ତୁ ଏବେ ମଧ୍ୟ କିଛି ଆଦିବାସୀ ଅଞ୍ଚଳରେ ସରକାରଙ୍କ ଦୃଷ୍ଟି ପଡୁନାହିଁ। ଏହା ଦେଖିବାକୁ ମିଳିଛି ପୋଲସରା ବ୍ଲକ ମାଳତେନ୍ତୁଳିଆ ଗ୍ରାମ ପଞ୍ଚାୟତ ଅଧୀନ ଆମ୍ବଖାଲ ସୌରା ଆଦିବାସୀ ଗଁ।ରେ। ଏଠାରେ ୪୫ରୁ ଊର୍ଦ୍ଧ୍ୱ ପରିବାର ବସବାସ କରୁଛନ୍ତି। କିନ୍ତୁ ଗାଁକୁ ଯିବାକୁ ଭଲ ରସ୍ତା ନାହିଁ, ପିଇବା ପାଣି, ସ୍ବାସ୍ଥ୍ୟ ଓ ଶିକ୍ଷାର ଘୋର ଅଭାବ ରହିଛି। ଯେଉଁ ରାସ୍ତା ଅଛି ତାହା ବିଲମାଳ କିଆରି ମଧ୍ୟରେ କାଦୁଅ ମାଟି ରାସ୍ତା। ଏଥିରେ ଲୋକଙ୍କୁ ଯାତାୟାତ କରିବାରେ ବହୁ ଅସୁବିଧା ହେଉଛି। ଏବଂ ଏହି ରାସ୍ତା ଦେଇ ଦମକଳ ଗାଡି, ଆମ୍ବୁଲାନ୍ସ ସହ ୧୦୨ ଗାଡ଼ି ଯିବା ଆସିବା କାରିପାରୁନାହିଁ। ଫଳରେ ରୋଗୀ, ଗର୍ଭବତୀ ଗାଡ଼ିରେ ମେଡିକାଲ ଯାଇନପାରୁ ନାହାନ୍ତି। ସେମାନଙ୍କୁ ପରିବାର ଲୋକେ ଦୋଳାକରି ଗ୍ରାମରେ ପ୍ରବାହିତ ଧନେଇ ନାଳ ଉପରେ ଅସ୍ଥାୟୀ ନିର୍ମିତ ବାଉଁଶ ପୋଲ ସାହାଯ୍ୟରେ ମେଡିକାଲକୁ ନେଉଛନ୍ତି। ବେଳେ ବେଳେ ଯିବା ରାସ୍ତାରେ ପ୍ରସବ ମଧ୍ୟ ହୋଇଥିବା ଘଟଣା ଲୋକେ କହିଛନ୍ତି। ଏଥିସହ ଏହି ପୋଲ ରାସ୍ତାରେ ଏକ କିଲୋମିଟର ଦୂରକୁ ଯାଇ ଏକ ପଥର କୂଅରୁ ପିଇବା ପାଣିି ଅଣିବାକୁ ପଡ଼ିଥାଏ। ପିଲାମାନେ ପାଠ ପଢିବା ପାଇଁ ଏହି ବାଉଁଶ ପୋଲ ଉପରେ ଖମ୍ବ ମାଧ୍ୟମରେ ଏକ କିଲୋମିଟରରେ ଥିବା ଭାବରଡା ସ୍କୁଲକୁ ଯିବା ଆସିବା କରୁଛନ୍ତି। ଏ ନେଇ ଗ୍ରାମବାସୀ ବାରମ୍ବାର ଗ୍ରାମ ସରପଞ୍ଚ ଓ ବ୍ଲକ ପ୍ରଶାସନକୁ ଅଭିଯୋଗ କରିଥିଲେ କୌଣସି ସୁଫଳ ମିଳି ନ ଥିବା ସେମାନେ କହିଛନ୍ତି। ଏ ସମ୍ପର୍କରେ ବିଡିଓ ଶମ୍ଭୁନାଥ ନନ୍ଦି କୁହନ୍ତିି, ପ୍ରଶାସନ ଦ୍ୱାରା ଶୀଘ୍ର ଉକ୍ତ ଗ୍ରାମକୁ ଗୋପିଆପଲ୍ଲୀ ଦେଇ ଏକ ପ୍ରଧାନମନ୍ତ୍ରୀ ସଡ଼କ ନିର୍ମାଣ କରାଯିବ। ବର୍ତ୍ତମାନ ତାହା ସରକାରଙ୍କ ଟେଣ୍ଡର ପ୍ରକ୍ରିୟାରେ ରହିଛି। ତେଣୁ ବର୍ଷା ଦିନ ପରେ ଉକ୍ତ କାର୍ଯ୍ୟ ଚାଲୁ ରହିବ ବୋଲି କହିିଛନ୍ତିି।
