ଓସ୍ଲୋ,୫ା୫: ସର୍ବପ୍ରଥମ ମ୍ୟାଗ୍ନସ କାର୍ଲସେନ ଆମନ୍ତ୍ରଣୀୟ ଚେସ୍ ଟୁର୍ନାମେଣ୍ଟ ଏପ୍ରିଲ ୧୮ରୁ ମେ ୩ ମଧ୍ୟରେ ଅନୁଷ୍ଠିତ ହୋଇଯାଇଛି। ଏହି ଶକ୍ତିଶାଳୀ ଅନ୍ଲାଇନ୍ ଟୁର୍ନାମେଣ୍ଟରେ ନରୱେ ଗ୍ରାଣ୍ଡମାଷ୍ଟର କାର୍ଲସେନ ନିଜେ ଚାମ୍ପିୟନ ହୋଇଛନ୍ତି। ଫାଇନାଲରେ ସେ ଗ୍ରାଣ୍ଡମାଷ୍ଟର ହିକାରୁ ନାକାମୁରାଙ୍କୁ ପରାସ୍ତ କରିଛନ୍ତି। ବିଶ୍ୱଚାମ୍ପିୟନ କାର୍ଲସେନ ନିଜେ ଏହି ଟୁର୍ନାମେଣ୍ଟ ଆୟୋଜନ କରିିଥିଲେ। ଏଥିରେ ବିଶ୍ୱର ଶକ୍ତିଶାଳୀ ୮ ଗ୍ରାଣ୍ଡମାଷ୍ଟର ଅଂଶଗ୍ରହଣ କରିଥିଲେ। ଚାମ୍ପିୟନ ହେବା ଫଳରେ କାର୍ଲସେନ ୨୫୦,୦୦୦ ଡଲାର ପୁରସ୍କାର ରାଶି ହାସଲ କରିଛନ୍ତି । ଏଥିରେ ଭାଗ ନେଇଥିବା ଅନ୍ୟ ଗ୍ରାଣ୍ଡମାଷ୍ଟରମାନେ ହେଲେ ଆମେରିକାର ଫାବିଆନୋ କାରୁଆନା, ଚାଇନାର ଲିରେନ ଡିଙ୍ଗ୍, ରୁଷିଆନ ଇଆନ ନେପୋମନିଆଚି, ଫ୍ରାନ୍ସର ମାକ୍ସିମ ଭାଚିଏର-ଲାଗ୍ରାଭେ, ନେଦରଲାଣ୍ଡ୍ସର ଅନିଶ ଗିରି, ଆମେରିକାର ହିକାରୁ ନାକାମୁରା ଏବଂ ଫିଡେ ପକ୍ଷରୁ ପ୍ରତିନିଧିତ୍ୱ କରୁଥିବା ଇରାନର ଆଲିରେଜା ଫିରୋଉଜା। ପ୍ରଥମ ପର୍ଯ୍ୟାୟରେ ଅନେକ ପ୍ରଶଂସକଙ୍କ ନଜର ଆଲିରେଜାଙ୍କ ଉପରେ ରହିଥିଲା। କାରଣ ଏହି ଇଭେଣ୍ଟର କିଛିଦିନ ପୂର୍ବରୁ ୧୨୮ ଖେଳାଳିଙ୍କୁ ନେଇ ଅନୁଷ୍ଠିତ ବେଣ୍ଟର ବ୍ଲିଜ୍ କପ୍ରେ ଆଲିରେଜା ୮.୫-୭.୫ ପଏଣ୍ଟରେ କାର୍ଲସେନଙ୍କୁୁ ପରାସ୍ତ କରିଥିଲେ ।