ଚେଷ୍ଟର-ଲି- ଷ୍ଟିଟ, ୪।୭: ଚଳିତ ଆଇସିସି ବିଶ୍ୱକପରେ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ସ୍ଥାନୀୟ ରିଭରସାଇଡ ଗ୍ରାଉଣ୍ଟରେ ଖେଳାଯାଉଥିବା ଏକ ମ୍ୟାଚ୍ବେଳେ ଏକ ନିଆରା ଘଟଣା ଦେଖିବାକୁ ମିଳିଥିଲା। ଦ୍ୱିତୀୟ ଇନିଂଶରେ ନ୍ୟୁଜିଲାଣ୍ଡ ଦଳ ବ୍ୟାଟିଂ କରୁଥିବାବେଳେ ହଠାତ୍ ଜଣେ ବ୍ୟକ୍ତି ଉଲଗ୍ନ ଅବସ୍ଥାରେ ପଡିଆ ଭିତରେ ହଠାତ୍ ପଶି ଡ୍ୟାନ୍ସ କରିବାକୁ ଲାଗିଥିଲେ। ଏଥିପାଇଁ ଖେଳ ୫ ମିନିଟ୍ ରୋକାଯାଇଥିଲା। ନ୍ୟୁଜିଲାଣ୍ଡ ପାଳିର ୩୪ତମ ଓଭରରେ ଏଭଳି ଘଟଣା ଘଟିଥିଲା। ସୁରକ୍ଷାକର୍ମୀଙ୍କୁ ଚକ୍ମା ଦେଇ ସମ୍ପୃକ୍ତ ବ୍ୟକ୍ତି ଜଣଙ୍କ ଷ୍ଟାଡିୟମରେ ପ୍ରବେଶ କରିଥିଲେ। ପଡିଆ ଭିତରେ କିଛି ସମୟ ଡ୍ୟାନ୍ସ କରିବା ପରେ ସୁରକ୍ଷାକର୍ମୀ ତାଙ୍କୁ ଧରି ପଡିଆ ବାହାରକୁ ନେଇଥିଲେ। ସୂଚନାଯୋଗ୍ୟ, ଚଳିତ ବିଶ୍ୱକପରେ ଦର୍ଶକ ପଡ଼ିଆ ଭିତରକୁ ପଶିଆସିବା ନୂଆ ଘଟଣା ନୁହେ। ପୂର୍ବରୁ ମଧ୍ୟ କିଛି ମ୍ୟାଚ୍ରେ ସୁଯୋଗ ଦେଖି ଦର୍ଶକ ପଡ଼ିଆ ଭିତରକୁ ପଶିଆସିବାର ନଜିର ରହିଛି।