ନୂଆଦିଲ୍ଲୀ,୨।୫ (ପି.ଟି.): ଦକ୍ଷିଣ ଆଫ୍ରିକା ପୂର୍ବତନ ଅଧିନାୟକ ହାନ୍ସି କ୍ରୋନିଏ ସାମିଲ ଥିବା ବହୁ ଚର୍ଚ୍ଚିତ ମ୍ୟାଚ୍ ଫିକ୍ସିଂ ମାମଲାରେ ବୁକି ସଞ୍ଜୀବ ଚାଓ୍ବଲାଙ୍କୁ ଜାମିନ ମିଳିଛି। ଦିଲ୍ଲୀର ଏକ କୋର୍ଟ ତାଙ୍କୁ ଜାମିନ ପ୍ରଦାନ କରିଛି। ୨ ଲକ୍ଷ ଟଙ୍କାର ବ୍ୟକ୍ତିଗତ ମୁଚାଲିକାରେ ସ୍ବତନ୍ତ୍ର ବିଚାରପତି ଆଶୁତୋଷ କୁମାର ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି। ଅଭିଯୁକ୍ତ ସଞ୍ଜୀବ ଗତ ୭୬ ଦିନ ହେବ ପୋଲିସ ହେପାଜତ୍ରେ ଥିଲେ। ଏ ନେଇ ତଦନ୍ତ ଶେଷ ହୋଇଥିବାରୁ ତାଙ୍କୁ ଜାମିନ ପ୍ରଦାନ କରାଯାଇଛି ବୋଲି ବିଚାରପତି କହିଛନ୍ତି। ତେବେ ଏହି ମାମଲାରେ ତଦନ୍ତକାରୀ ଅଧିକାରୀଙ୍କୁ ସ୍ବର ଓ ହାତଲେଖା ନମୁନା ପ୍ରଦାନରେ ସହଯୋଗ କରିବାକୁ କୋର୍ଟ ଚାଓ୍ବାଲଙ୍କୁ ନିର୍ଦ୍ଦେଶ ଦେଇଛି।
ଉଲ୍ଲେଖଥାଉ କି, ୫ଟି ମ୍ୟାଚ୍ରେ ଫିକ୍ସିଂ କରାଯାଇଥିବା ମାମଲାରେ ଚାଓ୍ବଲାଙ୍କୁ ଲଣ୍ଡନରୁ ପ୍ରତ୍ୟାର୍ପଣ କରାଯାଇ ଭାରତକୁ ଅଣାଯାଇଥିଲା। ୨୦୦୨ରେ ଏକ ବିମାନ ଦୁର୍ଘଟଣାରେ ମୃତ୍ୟୁବରଣ କରିଥିବା କ୍ରୋନିଏ ଏହି ମାମଲାରେ ସମ୍ପୃକ୍ତ ଥିଲେ ବୋଲି ପୋଲିସ ନ୍ୟାୟାଳୟଙ୍କୁ ଅବଗତ କରାଇଛି। ୨୦୦୦ ଫେବୃୟାରୀ- ମାର୍ଚ୍ଚରେ ଭାରତ ଗସ୍ତରେ ଦକ୍ଷିଣ ଆଫ୍ରିକା ଆସିଥିଲା। ଚାଓ୍ବଲା ଓ କ୍ରୋନିଏ ମିଳିତ ଭାବେ ମ୍ୟାଚ୍ ଫିକ୍ସିଂ କରିବାକୁ ଷଡଯନ୍ତ୍ର କରିଥିଲେ। ଦିଲ୍ଲୀ ଜନ୍ମିତ ବ୍ୟବସାୟୀ ଚାଓ୍ବଲା ବିଜନେସ ଭିଜା ମାଧ୍ୟମରେ ୧୯୯୬ରେ ଇଂଲଣ୍ଡ ଗସ୍ତକରିଥିଲେ।