ବାରିପଦା ଅଫିସ, ୩୦।୧୧- ମୟୂରଭଞ୍ଜ ଛଉନୃତ୍ୟର ପ୍ରଚାର ପ୍ରସାର ଲାଗି ଜିଲା ପ୍ରଶାସନ ପକ୍ଷରୁ ୨୦୧୬ରୁ କାର୍ଯ୍ୟକାରୀ ହେଉଥିବା ପ୍ରୋଜେକ୍ଟ ଛାଉଣୀର ଏକ ନୃତ୍ୟଦଳ ଓ୍ବେଷ୍ଟଇଣ୍ଡିଜ ଏବଂ ସାଉଥ୍ ଆମେରିକା ଯାତ୍ରା କରିଛନ୍ତି। ୮ ଜଣ ବିଶିଷ୍ଟ ଏହି ଦଳରେ ଗୁରୁ ପାଗୁଲୁ ଜେନା, ତ୍ରିଲୋଚନ ମହାନ୍ତଙ୍କ ସମେତ ବିରଞ୍ଚି ମହାନ୍ତି, ସଚିନା ଧଡା, ଟାରଜନ୍ ଘଡେଇ, ପ୍ରବୀନ ଦାସ, ଲାଲଟୁ ମହାନ୍ତ ଓ ନବକିଶୋର ଘଡେଇ ପ୍ରମୁଖ ସାମିଲ ଅଛନ୍ତି। ଏହି ଅବସରରେ ଜିଲାପାଳ ବିନୀତ ଭରଦ୍ୱାଜ ନୃତ୍ୟଶିଳ୍ପୀମାନଙ୍କୁ ଶୁଭକାମନା ଜଣାଇବା ସହିତ ମୟୂରଭଞ୍ଜ ଓ ଦେଶ ପାଇଁ ସୁନାମ ଆଣି ପ୍ରତ୍ୟାବର୍ତ୍ତନ କରିବେ ବୋଲି ଆଶାବ୍ୟକ୍ତ କରିଛନ୍ତି। ଛଉ ନୃତ୍ୟଶିଳ୍ପୀମାନେ ଯାତ୍ରା ପୂର୍ବରୁ ଜିଲାପାଳ ଭରଦ୍ୱାଜଙ୍କ ସମେତ ମହାରାଜା ପ୍ରବୀଣ ଚନ୍ଦ୍ର ଭଞ୍ଜଦେଓ ଏବଂ ମହାରାଣୀ ରଶ୍ମି ରାଜ୍ୟଲକ୍ଷ୍ମୀ ଭଞ୍ଜଦେଓଙ୍କୁ ଭେଟି ଆଶୀର୍ବାଦ ଗ୍ରହଣ କରିଛନ୍ତି।
ସୂଚନା ଅନୁଯାୟୀ, ଭାରତ ସରକାରଙ୍କ ବୈଦେଶିକ ବ୍ୟାପାର ମନ୍ତ୍ରାଳୟ ଅଧୀନରେ ଥିବା ଇଣ୍ଡିଆନ କାଉନସିଲ ଫର୍ କଲଚ୍ୟୁରାଲ ରେଲେଶନ୍ସ ପକ୍ଷରୁ ଏହି ଦଳ ଶୁକ୍ରବାର ଓ୍ବେଷ୍ଟଇଣ୍ଡିଜର ତ୍ରିନିଦାଦ୍ ଆଣ୍ଡ ଟବାଗୋକୁ ଯାତ୍ରାରମ୍ଭ କରିଛନ୍ତି। ସେମାନେ ତ୍ରିନିଦାଦ୍୍ ଆଣ୍ଡ ଟବାଗୋରେ ପହଞ୍ଚିବା ପରେ ଓ୍ବେଷ୍ଟଇଣ୍ଡିଜର ରାଜଧାନୀ ପୋର୍ଟ ଅଫ୍ ସ୍ପେନ୍ରେ ଭାରତୀୟ ଦୂତାବାସ ପକ୍ଷରୁ ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମଦିବସ ପାଳନ ଉତ୍ସବରେ ଛଉନୃତ୍ୟ ପରିବେଷଣ କରିବେ। ସେମାନେ ସେଠାରେ ଆସନ୍ତା ୯ ତାରିଖ ଯାଏ ରହିବା ସହ ବିଭିନ୍ନ ସ୍ଥାନରେ ଛଉନୃତ୍ୟ ପ୍ରଦର୍ଶନ କରିବେ। ଏହାସାଙ୍ଗକୁ ୩ଟି ସ୍ଥାନରେ ମୟୂରଭଞ୍ଜ ଛଉନୃତ୍ୟକୁ ନେଇ କର୍ମଶାଳା ଆୟୋଜନ କରିବାର କାର୍ଯ୍ୟକ୍ରମ ରହିଛି। ୯ ତାରିଖରେ ଉକ୍ତ ଦଳ ସାଉଥ୍ ଆମେରିକାର ଗୁଏନାକୁ ଯାଇ ସେଠାକାର ଭାରତୀୟ ଦୂତାବାସ ଦ୍ୱାରା ଆୟୋଜିତ ତିନୋଟି ଉତ୍ସବରେ ଛଉନୃତ୍ୟ ପ୍ରଦର୍ଶନ କରିବେ। ଉକ୍ତ ଦେଶରେ ମଧ୍ୟ ଦୁଇଟି କର୍ମଶାଳାର ଆୟୋଜନ କରାଯାଇଛି। ସମସ୍ତ କାର୍ଯ୍ୟକ୍ରମ ସାରି ୧୧ ତାରିଖରେ ଦଳ ସ୍ବଦେଶକୁ ପ୍ରତ୍ୟାବର୍ତ୍ତନ କରିବ। ଉଲ୍ଲେଖନୀୟ ଯେ, ମୟୂରଭଞ୍ଜ ଛଉନୃତ୍ୟର ପୂର୍ବ ଗୌରବର ପୁନଃ ପ୍ରତିଷ୍ଠା ସହିତ ଏହାର ସଂରକ୍ଷଣ ଉଦ୍ଦେଶ୍ୟରେ ୨୦୧୬ରେ ତତ୍କାଳୀନ ଜିଲାପାଳ ରାଜେଶ ପ୍ରଭାକର ପାଟିଲ ସ୍ଥାପନା କରିଥିଲେ ପ୍ରୋଜେକ୍ଟ ଛାଉଣୀ। ପ୍ରସିଦ୍ଧ ଛଉ ନୃତ୍ୟାଙ୍ଗନା ତଥା ଗବେଷିକା ଶୁଭଶ୍ରୀ ମୁଖାର୍ଜୀ ଏହାର ରୂପରେଖ ପ୍ରସ୍ତୁତ କରିଥିଲେ।