ଭୁବନେଶ୍ୱର,୧୬।୧୨(ବ୍ୟୁରୋ): ମୟୂର ଓ ହରିଣ ପାଇଁ ରାଜଧାନୀରେ ସୃଷ୍ଟି ହେଉଛି ଟ୍ରାଫିକ ଜାମ୍। ଭରତପୁର-ଡମପଡ଼ା ଅଭୟାରଣ୍ୟକୁ ଲାଗି ରହିଥିବା ରେଣ୍ଟାଲ ଛକରୁ କଳିଙ୍ଗ ଷ୍ଟୁଡିଓ ଛକ ମଧ୍ୟରେ କିଛିଦିନ ହେବ ଦେଖିବାକୁ ମିଳୁଛି ଏହି ସ୍ଥିତି। ପ୍ରତିଦିନ ସକାଳ ଓ ଅପରାହ୍ନରେ ହରିଣ, ମୟୂର, ବାର୍ହା ଆଦି ବହୁ ବନ୍ୟାପ୍ରାଣୀ ବିଚରଣ କରୁଥିବା ଦୃଶ୍ୟ ଦେଖିବାକୁ ଲୋକେ ଘଣ୍ଟା ଘଣ୍ଟା ଧରି ଅଟକି ରହୁଛନ୍ତି। ରାସ୍ତା ଉପରେ ଗାଡ଼ି ରଖି ଏଭଳି ନିଆରା ଦୃଶ୍ୟ ଉପଭୋଗ କରୁଛନ୍ତି। ଫଳରେ ଏହି ସମୟରେ ସେଠାରେ ଟ୍ରାଫିକ ଜାମ୍ ହେଉଛି।
ବନ୍ୟପ୍ରାଣୀ ବାହାରକୁ ନ ଆସିବା ଲାଗି ଅଭୟାରଣ୍ୟ ଚତୁଃପାର୍ଶ୍ୱରେ ପାଚେରି ରହିଛି। ହେଲେ ଏହିସବୁ ସ୍ଥାନରେ ପାଚେରି କମ୍ ଉଚ୍ଚର ଥିବାରୁ ବନ୍ୟପ୍ରାଣୀମାନେ ପାଣି ପିଇବାକୁ ଆସିବା ବେଳେ ବାହାରକୁ ଦୃଶ୍ୟମାନ ହେଉଛି। ଲୋକେ ଦେଖୁଥିବାବେଳେ ଚିତ୍କାର କରି ଡାକୁଥିବାରୁ ସେହି ବନ୍ୟପ୍ରାଣୀମାନେ ପ୍ରଭାବିତ ହେଉଛନ୍ତି। ଏପରି କି କେହି କେହି ଟେକା ମାଡ଼ କରୁଥିବାରୁ ସେମାନଙ୍କ ପ୍ରତି ବିପଦ ରହିଛି। ଏ ପରିସ୍ଥିତିରେ ବନ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇ ନାହିଁ। ତେଣୁ ଉକ୍ତ ସ୍ଥାନରେ ଆବଶ୍ୟକ କର୍ମଚାରୀ ନିୟୋଜିତ କରାଯିବା ଜରୁରୀ ହୋଇପଡିଛି।