ବେଳେବେଳେ ପ୍ରଯୋଜକ ଯାହାଙ୍କୁ ଲିଡ୍ ରୋଲ୍ରେ ନେବାକୁ ଚାହିଁଥାଆନ୍ତି, ତାହା କେତେକ କାରଣରୁ ସମ୍ଭବ ହୋଇ ନ ଥାଏ। କିନ୍ତୁ ଏହା ବଦଳରେ ସେ ଯାହାକୁ ସାଇନ୍ କରାନ୍ତି, ସେ ମଧ୍ୟ ଭୂମିକାଟିକୁ ସଫଳ କରିବାରେ ପଶ୍ଚାଦ୍ପଦ ହୁଅନ୍ତି ନାହିଁ। ୨୦୦୮ରେ ରିଲିଜ୍ ହୋଇଥିଲା ‘ସ୍ଲମ୍ଡଗ ମିଲେନିୟର’। ଖ୍ରୀଷ୍ଟିଆନ୍ କଲସୋନଙ୍କ ଦ୍ୱାରା ପ୍ରଯୋଜିତ ଏବଂ ଡ୍ୟାନି ବୋଲେଙ୍କ ନିର୍ଦ୍ଦେଶିତ ଏହି ଫିଲ୍ମଟି ବେଶ୍ ସଫଳତା ଅର୍ଜନ କରିଥିଲା। ଏହାର ମୁଖ୍ୟ ଭୂମିକାରେ ଅଭିନୟ କରିଥିଲେ ଅନିଲ କପୁର, ଫ୍ରିଡା ପିଣ୍ଟୋ, ଦେବ୍ ପଟେଲ ଏବଂ ଇରଫାନ୍ ଖଁା ପ୍ରମୁଖ କଳାକାର। କିନ୍ତୁ ଏହି ଫାଇନାଲ କାଷ୍ଟିଂ ପୂର୍ବରୁ ଏକ ଘଟଣା ଘଟିଥିଲା। ଉଭୟ ପ୍ରଯୋଜକ ଏବଂ ନିର୍ଦ୍ଦେଶକ ଉକ୍ତ ଫିଲ୍ମରେ ଶାହରୁଖ ଅଭିନୟ କରନ୍ତୁ ବୋଲି ଚାହିଁଥିଲେ। ତାଙ୍କ ସହ ମଧ୍ୟ ଯୋଗାଯୋଗ କରାଯାଇଥିଲା। କିନ୍ତୁ ସେ ଏଥିରେ ଅଭିନୟ କରିବେ ନାହିଁ ବୋଲି ମନା କରି ଦେଇଥିଲେ। ତା’ପରେ ଅନିଲଙ୍କୁ ଯୋଗାଯୋଗ କରାଗଲା ଏବଂ ଅଫରଟି ପାଇବା ପରେ ସେ ହଁ ଭରିଥିଲେ। ଯଦି ସେତେବେଳେ ଶାହରୁଖ ରାଜି ହୋଇଥାଆନ୍ତେ, ତେବେ ହୁଏତ ଏହି ଫିଲ୍ମର କାଷ୍ଟିଂରେ ଅନିଲଙ୍କୁ ସ୍ଥାନ ମିଳି ନ ଥାଆନ୍ତା।