ଯାଜପୁର ଅଫିସ, ୨୬।୪- ଯାଜପୁର ଜିଲା ଦଶରଥପୁର ବ୍ଲକର ୩ଟି ପଞ୍ଚାୟତର ୫ ଗ୍ରାମକୁ ରବିବାର କଣ୍ଟେନମେଣ୍ଟ ଜୋନ୍ ଭାବେ ଜିଲାପାଳ ରଞ୍ଜନ କୁମାର ଦାସ ଘୋଷଣା କରିଛନ୍ତି। ପୂର୍ବରୁ ବିରଜାପୁର ଗ୍ରାମକୁ କଣ୍ଟେନମେଣ୍ଟ ଘୋଷଣା ହୋଇଥିବାରୁ ଏହାକୁ ମେ’ ମାସ ୧୦ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି। ଏହାବାଦ କଟିକଟା, ବିହିପୁର, ମହାନ୍ତିପାଟଣା ଓ ମଲ୍ଲିକାପୁର ଗ୍ରାମକୁ ରବିବାର ସକାଳ ୮ଟାରୁ ମେ ୧୦ ତାରିଖ ସକାଳ ୮ଟା ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ୍ କରାଯାଇଛି। ଏହିସବୁ ଗ୍ରାମରେ ୧୪୨୨ ଘର ରହିଥିବାବେଳେ ୬୩୫୩ ଲୋକ ବସବାସ କରନ୍ତି। ଶନିବାର ରାତିରେ ଦଶରଥପୁର ବ୍ଲକର ଉପରୋକ୍ତ ଗ୍ରାମମାନଙ୍କରେ ୬ ଜଣ କରୋନା ସଂକ୍ରମିତ ଘୋଷଣା ହେବା ପରେ ଏହି ନିଷ୍ପତ୍ତି ନିଆଯାଇଛି। ଦଶରଥପୁର ତହସିଲଦାର ସୌଭାଗ୍ୟ ବେହେରା, ବିଡିଓ ନାରାୟଣ ଚନ୍ଦ୍ର ନାୟକ, ମେଡିକାଲ ଅଫିସର ଉମାକାନ୍ତ ମଲ୍ଲିକଙ୍କୁ ଏହି ଅଞ୍ଚଳର ନୋଡାଲ ଅଫିସର ଭାବେ ନିଯୁକ୍ତି ଦିଆଯାଇଛି। ସଂକ୍ରମିତ ବ୍ୟକ୍ତିମାନଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିମାନଙ୍କୁ ଚିହ୍ନଟ ପ୍ରକ୍ରିୟା ଜାରି ରହିଛି। ଏହାସହ ସଂକ୍ରମିତଙ୍କୁ କଳିଙ୍ଗନଗର କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଛି।