ଯାଜପୁର ଅଫିସ,୩।୯- ଓଡ଼ିଶା ଦେଇ ଯାଇଥିବା ହାୱଡା-ଚେନ୍ନାଇ ମୁଖ୍ୟ ରେଳଲାଇନର କଟକ ଓ ଭଦ୍ରକ ମଧ୍ୟରେ ଥିବା ଯାଜପୁର-କେନ୍ଦୁଝର ରୋଡ ଷ୍ଟେଶନର ନାମକୁ ଯାଜପୁର ରେଳଷ୍ଟେଶନ ନାମରେ ନାମିତ ପ୍ରସ୍ତାବ ଭାଜପା ପକ୍ଷରୁ ବିରୋଧ କରାଯାଇଛି। ଅଗଷ୍ଟ ୨୮ରେ ଧରିତ୍ରୀରେ ଏ ସଂକ୍ରାନ୍ତରେ ସବିଶେଷ ତଥ୍ୟ ଭିତ୍ତିକ ଖବର ପ୍ରକାଶ ପାଇବା ପରେ ବିଭିନ୍ନ ମହଲରୁ ପ୍ରତିକ୍ରିୟା ସୃଷ୍ଟି ହୋଇଛି। ଏହିକ୍ରମରେ ଭାଜପା ବ୍ୟାସଦେବ ମଣ୍ଡଳ, ବ୍ୟାସନଗର ପକ୍ଷରୁ ଇଷ୍ଟକୋଷ୍ଟ ରେଳୱେ ଡିଆରଏମଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ଉକ୍ତ ସ୍ମାରକପତ୍ରରେ ଦର୍ଶାଯାଇଛି ଯେ, ୧୫ଦିନ ମଧ୍ୟରେ ଯାଜପୁରରୋଡ କିମ୍ବା ଡୋଲିପୁର ନାମରେ ଯାଜପୁର-କେନ୍ଦୁଝରରୋଡ ଷ୍ଟେଶନର ନାମକରଣ ପରିବର୍ତ୍ତନ କରାଯାଉ। ଅନ୍ୟଥା ଯାଜପୁର-କେନ୍ଦୁଝରରୋଡ ଷ୍ଟେଶନ ସମ୍ମୁଖରେ ବ୍ୟାପକ ଆନ୍ଦୋଳନ କରାଯିବ ବୋଲି ସ୍ମାରକପତ୍ରରେ ଚେତାବନୀ ଦିଆଯାଇଛି। ସ୍ମାରକପତ୍ରରେ ଆହୁରି ଦର୍ଶାଯାଇଛି ଯେ, ଯାଜପୁର-କେନ୍ଦୁଝରରୋଡ ରେଳଷ୍ଟେଶନର ନାମ ପରିବର୍ତ୍ତନ କରି ଯାଜପୁର ରେଳ ଷ୍ଟେଶନ ନାମରେ ନାମିତ କରିବାକୁ ଦିଲ୍ଲୀରେ ବାସ କରୁଥିବା ହରିଶ ସାହୁ ଯାହାଙ୍କ ଏହି ଅଞ୍ଚଳ ପ୍ରତି କୌଣସି ସଂଯୋଗ ନାହିଁ ସେ ରେଳମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଏହି ଦାବି ଉପରେ ରାଜ୍ୟ ପରିବହନ ଓ ବାଣିଜ୍ୟ ବିଭାଗର ଅତିରିକ୍ତ ସଚିବ ତାଙ୍କ ପତ୍ରସଂଖ୍ୟା ୫୬୮୦/୨୭ା୮ା୨୦୧୯ରେ ଯାଜପୁର ଜିଲାପାଳଙ୍କୁ ଏକ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଯାଜପୁର ଜିଲାର ନାମ ଏବଂ ଏହାର ସଦର ମହକୁମା ଷ୍ଟେଶନଠାରୁ ୩୫ କି.ମି. ଦୂରରେ ରହିଛି। ହେଲେ ବର୍ତ୍ତମାନ ଯାଜପୁର-କେନ୍ଦୁଝରରୋଡ ଷ୍ଟେଶନର ଯେଉଁ ନାମକରଣ ପ୍ରକ୍ରିୟା ଆରମ୍ଭ ହୋଇଛି ତାହା ସମ୍ପୂର୍ଣ୍ଣ ବେଆଇନ। ସ୍ଥାନୀୟ ଲୋକଙ୍କ କୌଣସି ମତ ନ ନେଇ ଏଭଳି ପଦକ୍ଷେପ ନେବା ଅନ୍ୟାୟ ଏବଂ ସ୍ଥାନୀୟ ଲୋକଙ୍କ ମନୋଭାବକୁ ଆଘାତ ଦିଆଯାଇଛି। ଯେତେବେଳେ ଯାଜପୁର-କେନ୍ଦୁଝରରୋଡ ଷ୍ଟେଶନର ନାମକରଣ ହୋଇଥିଲା ସେତେବେଳେ ଯାଜପୁରରୁ କେନ୍ଦୁଝରକୁ ରେଳ ସଂଯୋଗ ନ ଥିଲା। କିନ୍ତୁ ବର୍ତ୍ତମାନ ପରିସ୍ଥିତିରେ ପରିବର୍ତ୍ତନ ହୋଇଛି। ପୂର୍ବରୁ ନାଗରିକ କମିଟି ପକ୍ଷରୁ ଏହି ଷ୍ଟେଶନର ନାମକରଣ ସନ୍ଥ ବ୍ୟାସଦେବଙ୍କ ନାମରେ ବ୍ୟାସନଗର କରିବାକୁ ଦାବି ହୋଇଥିଲା। ହେଲେ ଏହି ନାମରେ ଏକ ଅନ୍ୟ ଷ୍ଟେଶନ ଥିବାରୁ ସେତେବେଳେ ଏହାକୁ ଖାରଜ କରି ଦିଆଯାଇଥିଲା। ସେତେବେଳେ ସର୍ବସମ୍ମତିକ୍ରମେ ଏହି ଷ୍ଟେଶନର ନାମ ଯାଜପୁରରୋଡ କିମ୍ବା ଡୋଲିପୁର କରିବାକୁ ଦାବି ହେଉଥିଲା। କିନ୍ତୁ ବର୍ତ୍ତମାନ ପୂର୍ବ ଯୋଜନା ଅନୁସାରେ ଏହି ଷ୍ଟେଶନର ନାମକରଣ ଯାଜପୁର କରିବାକୁ ପ୍ରୟାସ ଆରମ୍ଭ ହୋଇଛି। ଯାହାକୁ କୌଣସି ପ୍ରକାରେ ଗ୍ରହଣ କରାଯାଇ ପାରିବ ନାହିଁ ବୋଲି ଭାଜପା ପକ୍ଷରୁ କୁହାଯାଇଛି। ଅନ୍ୟପକ୍ଷେ ରେଳୱେ ବୋର୍ଡର କର୍ମସିଆଲ ସାର୍କୁଲାର-୧୨ ନମ୍ବର/୧୭ା୫ା୧୯୯ ଅନୁସାରେ ଭାରତ ସରକାରଙ୍କ ଗୃହ ମନ୍ତ୍ରଣାଳୟ ବିଭାଗ ଏକାକୀ ନାମ ପରିବର୍ତ୍ତନ କରିବାକୁ ମଞ୍ଜୁରୀ ଦେଇପାରିବେ। ଏହାପରେ ପ୍ରସ୍ତାବଟି ରାଜ୍ୟ ସରକାରଙ୍କ ଦ୍ୱାରା ଅନୁମୋଦିତ ହୋଇ ଗୃହ ମନ୍ତ୍ରଣାଳୟକୁ ଯିବା ଉଚିତ ବୋଲି ଇଷ୍ଟକୋଷ୍ଟ ରେଳୱେ ପକ୍ଷରୁ ସୂଚନା ଦିଆଯାଇଛି।