ଅନୁଗୋଳ ଅଫିସ/ବନ୍ତଳା, ୨୬।୬- ଯୁକ୍ତ ଦୁଇ କଳାରେ ଅନୁଗୋଳ ଜିଲା ଟପ୍ପର ହୋଇଥିବା ମଧୁସ୍ମିତା ବେହେରାଙ୍କୁ ଜିଲାପାଳ ମନୋଜ କୁମାର ମହାନ୍ତି ମଙ୍ଗଳବାର ୫ ହଜାର ଟଙ୍କାର ଆର୍ଥୀକ ସହାୟତା ପ୍ରଦାନ କରିଛନ୍ତି। ଏଥିସହିତ ଭବିଷ୍ୟତରେ ଆହୁରି ଅଧିକ ପରିଶ୍ରମ କରି ଜିଲା ପାଇଁ ସୁନାମ ଅର୍ଜନ କରିବାକୁ ସେ ପରାମର୍ଶ ଦେଇଛନ୍ତି। ସେହିପରି ଏହି ମେଧାବୀ ଛାତ୍ରୀଙ୍କ ସମସ୍ତ ପାଠପଢ଼ା ଖର୍ଚ୍ଚ ବହନ କରିବାକୁ ବଲିଉଡରେ କାମ କରୁଥିବା ଅନୁଗୋଳ ଖାଲଗଁାର କୃତାର୍ଥ ପ୍ରଧାନ ପ୍ରତିଶ୍ରୁତି ଦେଇଥିବା ସୂଚନା ମିଳିଛି।
ପ୍ରକାଶ ଯେ, ପୋକତୁଙ୍ଗା ଗ୍ରାମର ମଧୁସ୍ମିତା ଯୁକ୍ତ ଦୁଇ କଳାରେ ୪୯୯ ମାର୍କ ରଖିଛନ୍ତି। ବନ୍ତଳା ଚନ୍ଦ୍ରଶେଖର ଉଚ୍ଚ ମାଧ୍ୟମିକ ବିଦ୍ୟାଳୟରୁ ପାସ୍ କରିବା ପରେ ସେ ଯୁକ୍ତ ୩ରେ ରାଜନୀତି ବିଜ୍ଞାନ ସମ୍ମାନ ନେଇ ରେଭେନ୍ସାରେ ପଢ଼ିବାକୁ ଲକ୍ଷ୍ୟ ରଖିଛନ୍ତି। ବାପା ପଦ୍ମଚରଣ ବେହେରା ଚା ଦୋକାନ କରିଥିବାରୁ ପରିବାରର ଆର୍ଥିକ ଅବସ୍ଥା ଆଦୌ ଭଲ ନୁହେଁ। ମାଟ୍ରିକ ପାସ୍ କରିବା ପରେ ବହୁ କଷ୍ଟରେ ସେ ଯୁକ୍ତ୨ ପଢ଼ିପାରିଛନ୍ତି। ତେଣୁ ଆଗାମୀ ଦିନରେ ଉଚ୍ଚ ଶିକ୍ଷାରେ ଅର୍ଥ ବାଧକ ସାଜିବା ନେଇ ସେ ଚିନ୍ତିତ ଥିବା ମଧୁସ୍ମିତା କହିଛନ୍ତି। ଗତ ୨୪ ତାରିଖରେ ତାଙ୍କ ପାଠପଢ଼ାରେ ଅର୍ଥ ବାଧକ ସାଜିଥିବା ସମ୍ପର୍କରେ ‘ଧରିତ୍ରୀ’ରେ ଖବର ପ୍ରକାଶ ପରେ ପ୍ରଶାସନ ଓ ମୁମ୍ବାଇରୁ ତାଙ୍କୁ ସହାୟତାର ହାତ ବଢ଼ିଥିବା ମଧୁସ୍ମିତା ସୂଚନା ଦେଇଛନ୍ତି। ଚନ୍ଦ୍ରଶେଖର ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ଅଜୟ କୁମାର ସାହୁ କହିଛନ୍ତି, ଅଭାବ ଅନାଟନ ସତ୍ତ୍ବେ ମଧୁସ୍ମିତା କଠିନ ପରିଶ୍ରମ କରି ୮୩.୧୬ ପ୍ରତିଶତ ମାର୍କ ରଖି ଜିଲା ପାଇଁ ଗୌରବ ଆଣିପାରିଛନ୍ତି।