କେନ୍ଦ୍ରାପଡା ଅଫିସ, ୨୫ା୬- ପଦାର୍ଥ ବିଜ୍ଞାନର ୪ଟି ସେମିଷ୍ଟର ପରୀକ୍ଷାରେ ୭୦ରୁ ଊର୍ଦ୍ଧ୍ୱ ନମ୍ବର ରଖିଥିବା ୧୫ ଜଣ ଛାତ୍ରୀ ପଞ୍ଚମ ସେମିଷ୍ଟର ପରୀକ୍ଷାରେ ଫେଲ ହୋଇଯାଇଛନ୍ତି । ଏପରିକି ୧୦ରୁ ଅଧିକ ଛାତ୍ରୀ ଶୂନ ନମ୍ବର ରଖିଛନ୍ତି। ଉତ୍ତର ଖାତାର ଫଟୋ କପି ପାଇଁ ବିଶ୍ୱ ବିଦ୍ୟାଳୟ ନିକଟରେ ଅର୍ଥ ଦାଖଲ କରାଯାଇଥିଲେ ମଧ୍ୟ୍ୟ ସମୟ ଅବଧି ମଧ୍ୟରେ ତାହା ମିଳିପାରି ନାହିଁ । ଏପରି ଘଟଣା ରମାଦେବୀ ବିଶ୍ୱ ବିଦ୍ୟାଳୟ ଅଧୀନରେ ପରୀକ୍ଷା ଦେଇଥିବା କେନ୍ଦ୍ରାପଡ଼ା ସହରର ଗୋପସ୍ଥିତ ତୁଳସୀ ମହିଳା ମହାବିଦ୍ୟାଳୟରେ ଘଟିଛି । ଯୁକ୍ତ ୩ ତୃତୀୟ ବାର୍ଷିକ ଛାତ୍ରୀମାନେ ଏହି ଘଟଣା ସମ୍ପର୍କରେ ସୋମବାର ଏଡିଏମ୍ଙ୍କୁ ଜଣାଇଛନ୍ତି। ମଙ୍ଗଳବାର ଏନେଇ ମହାବିଦ୍ୟାଳୟ ପରିସରରେ ଆନ୍ଦୋଳନ କରାଯିବ ବୋଲି ସେମାନେ ସୂଚନା ଦେଇଛନ୍ତି ।
ଏ ସମ୍ପର୍କରେ ଛାତ୍ରୀ ସଶ୍ମିତା ମହାନ୍ତି କହିଛନ୍ତି, ତୁଳସୀ ମହାବିଦ୍ୟାଳୟର ପଦାର୍ଥ ବିଜ୍ଞାନ ସମ୍ମାନରେ ୧୬ ଜଣ ଛାତ୍ରୀ ପରୀକ୍ଷା ଦେଇଥିଲେ । ଗତ ୪ଟି ସେମିଷ୍ଟାର ପରୀକ୍ଷାରେ ସମସ୍ତ ଛାତ୍ରୀ ୭୦ରୁ ଊର୍ଦ୍ଧ୍ୱ ମାର୍କ ରଖିଛନ୍ତି । ମାତ୍ର ପଞ୍ଚମ ସେମିଷ୍ଟର ପରୀକ୍ଷାରେ ୧୫ ଜଣ ଛାତ୍ରୀ ଫେଲ ହୋଇଥିବା ନେଇ ପରୀକ୍ଷା ଫଳରୁ ଜଣାପଡିଛି । ଏ ସମ୍ପର୍କରେ ମହାବିଦ୍ୟାଳୟର ଦୃଷ୍ଟି ଆକର୍ଷଣ କରିବା ସହ ପରୀକ୍ଷାର ଫଟୋ କପି ପାଇଁ ଗତ ମେ ୧୩ରେ ଦେୟ ଦାଖଲ ହୋଇଛି । ଇତିମଧ୍ୟରେ ସମୟ ଅବଧି ୩୦ ଦିନ ବିତି ଯାଇଥିଲେ ମଧ୍ୟ ପରୀକ୍ଷା ଖାତାର ନକଲ ହସ୍ତଗତ ହୋଇନାହିଁ । ଫଳରେ ଛାତ୍ରୀମାନେ ମାନସିକ ଅଶାନ୍ତି ଦେଇ ଗତି କରୁଛନ୍ତି । ଏଡିଏମ୍ ବସନ୍ତ କୁମାର ରାଉତଙ୍କୁ ଦାବିପତ୍ର ପ୍ରଦାନ ସମୟରେ ଛାତ୍ରୀ ସଶ୍ମିତାଙ୍କ ସହ ଅର୍ଚ୍ଚନା ବେହେରା, ସୁନିତା ଗିରି, ପିନୁ ପାଇଟାଳ ପ୍ରମୁଖ ଉପସ୍ଥିତ ଥିଲେ। ଏସମ୍ପର୍କରେ ଅଧ୍ୟକ୍ଷ ସ୍ମୃତିରଞ୍ଜନ ବେହେରା କୁହନ୍ତି, ଛାତ୍ରୀଙ୍କ ମାର୍କ କମିବା ସମ୍ପର୍କରେ ମହାବିଦ୍ୟାଳୟରୁ ବିଶ୍ୱବିଦ୍ୟାଳୟକୁ ଚିଠି ହୋଇଛି । ତାହାର ଉତ୍ତର ଅଦ୍ୟାବଧି ମିଳିନାହିଁ ।