ବଇଣ୍ଡା,୮ା୬(ଡି.ଏନ.ଏ.)- ମିସ୍କଲ୍ରୁ ମହିଳାଙ୍କ ସହ ପ୍ରେମ ଓ ସ୍ବାମୀ ନ ଥିବା ବେଳେ ରାତିରେ ତାଙ୍କ ଘରେ ପଶିବା ଜଣେ ଯୁବକଙ୍କୁ ମହଙ୍ଗା ପଡ଼ିଛି। ଗ୍ରାମବାସୀଙ୍କ ନଜରକୁ ଏହା ଆସିବା ପରେ ଯୁବକ ଜଣକ ବନ୍ଧାହେବା ସହ ସମ୍ପୃକ୍ତା ମହିଳାଙ୍କୁ ବିବାହ କରିବାକୁ ପଡ଼ିଛି। ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ଼ ଥାନା ଅଞ୍ଚଳରେ ଘଟିଥିବା ଏହି ଘଟଣା ସୋମବାର ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ୩ ବର୍ଷ ତଳୁ ସମ୍ପୃକ୍ତା ମହିଳାଙ୍କ ସହ ହଣ୍ଡପା ଥାନା ଅଞ୍ଚଳର ଜଣେ ଯୁବକଙ୍କ ମିସ୍ କଲ୍ରୁ ପ୍ରେମ ସମ୍ପର୍କ ଗଢ଼ି ଉଠିଥିଲା। ମହିଳାଙ୍କ ସ୍ବାମୀ ଅନୁଗୋଳରେ କାମ କରୁଥିବାରୁ ସେ ପ୍ରାୟ ସମୟରେ ଘରେ ଅନୁପସ୍ଥିତ ରହୁଥିଲେ। ଏହାର ସୁଯୋଗ ନେଇ ଯୁବକ ଜଣକ ମହିଳାଙ୍କ ଘରକୁ ରାତିରେ ଯିବାଆସିବା କରୁଥିଲେ। ରବିବାର ରାତିରେ ମହିଳାଙ୍କ ସ୍ବାମୀ ନ ଥିବା ବେଳେ ସମ୍ପୃକ୍ତ ଯୁବକ ଦୂରରେ ବାଇକ୍ ରଖି ସେଠାକୁ ଯାଇଥିବା ସ୍ଥାନୀୟ ଲୋକେ ଦେଖି ଉଭୟେ ଥିବା ରୁମ୍ରେ ତାଲା ପକାଇ ଦେଇଥିଲେ। ପରେ ଗ୍ରାମବାସୀ ତାଲା ଖୋଲି ମହିଳାଙ୍କ ରୁମ୍ରୁ ଯୁବକଙ୍କୁ ବାହାର କରି ବାନ୍ଧି ଦେଇଥିଲେ। ଉଭୟଙ୍କ ପରିବାରକୁ ନେଇ ଗ୍ରାମରେ ଏକ ବୈଠକ ବସିଥିଲା। ସେଥିରେ ନିଷ୍ପତ୍ତି ଅନୁଯାୟୀ ସମ୍ପୃକ୍ତ ଯୁବକ ମହିଳା ଜଣଙ୍କୁ ଶଙ୍ଖା, ସିନ୍ଦୂର ପିନ୍ଧାଇ ସ୍ତ୍ରୀ ଭାବେ ଗ୍ରହଣ କରିଥିଲେ।