ମହାକାଳପଡ଼ା,୨୭।୧୧(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ଥାନା ଅଧୀନ ଜଅଁରା ଗ୍ରାମରେ ଜଣେ ଯୁବକଙ୍କ ମୃତଦେହ ବୁଧବାର ସକାଳେ ତାଙ୍କ ଘରୁ ଉଦ୍ଧାର କରାଯାଇଛି। ମୃତକ ହେଲେ ପ୍ରମୋଦ ସାହୁଙ୍କ ପୁଅ ପ୍ରଶାନ୍ତ (୨୨)।
ସୂଚନାନୁଯାୟୀ, ପ୍ରଶାନ୍ତ ଓ ତାଙ୍କ ସାଙ୍ଗ ଉକ୍ତ ଗ୍ରାମର ଫକୀର ପରିଡ଼ାଙ୍କ ପୁଅ ଅଶୋକ (୪୨) ମଙ୍ଗଳବାର ସନ୍ଧ୍ୟାରେ କୁକୁଡା ମାଂସ ବାଣ୍ଟକରି ନିଜ ଘରକୁ ନେଇଥିଲେ। ୪ ଦିନ ଧରି ପ୍ରଶାନ୍ତଙ୍କ ଘରକୁ ଅଶୋକ ଶୋଇବାକୁ ଆସୁଥିଲା ବେଳେ ବୁଧବାର ସକାଳେ ମଧ୍ୟ ତାଙ୍କ ବାଇକ୍ ପ୍ରଶାନ୍ତଙ୍କ ଘର ସାମ୍ନାରେ ରହିଥିଲା। ଅନ୍ୟପଟେ ସକାଳୁ ପ୍ରଶାନ୍ତଙ୍କ ମୃତଦେହ ଦେଖି ପରିବାର ଲୋକେ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ମୃତଦେହ ଉଦ୍ଧାର କରି ଘଟଣାସ୍ଥଳରୁ ଏକ ମୋବାଇଲ, ଅଶୋକଙ୍କ ଗାଡ଼ି, ଦାନାଦର ପ୍ୟାକେଟ୍, ଏକ କଟୁରି ଓ ମଦ ବୋତଲ ଜବତ କରିଛି। ଏ ନେଇ ପ୍ରଶାନ୍ତଙ୍କ ପରିବାର ପକ୍ଷରୁ ଅଶୋକଙ୍କ ନାମରେ ଥାନାରେ ହତ୍ୟା ଅଭିଯୋଗ ହୋଇଥିବା ବେଳେ ପୋଲିସ କେସ୍ (ନଂ.୧୪୩/୧୯)ରେ ଏକ ମାମଲା ରୁଜୁକରି ତଦନ୍ତ ଚଳାଇଛି ।
