ବାରିପଦା ଅଫିସ/ବଡ଼ସାହି,୧୨ା୧୧(ସ୍ବ.ପ୍ର)- ମୟୂରଭଞ୍ଜ ଜିଲା ବଡ଼ସାହି ଥାନା ଅଧିକାରୀ ବିଶ୍ୱଜ କୁମାର ରାଉତରାୟଙ୍କୁ ସୋମବାର ରାତିରେ ବଦଳି କରାଯାଇଛି। ତାଙ୍କୁ ଜିଲା ପୋଲିସ ମୁଖ୍ୟାଳୟରେ ଅବସ୍ଥାପିତ କରାଯାଇଛି। ତାଙ୍କ ସ୍ଥାନରେ ସବ-ଇନ୍ସପେକ୍ଟର ମଞ୍ଜୁଲତା ଧଡ଼ାଙ୍କୁ ଥାନା ଅଧିକାରୀ ଭାବେ ଦାୟିତ୍ୱ ପ୍ରଦାନ କରାଯାଇଛି। ଏନେଇ ଏସ୍ପି ପରମାର ସ୍ମିଥ ପୁରୁଷୋତ୍ତମଦାସ ସୂଚନା ଦେଇଛନ୍ତି। ଆଡମିନ୍ଷ୍ଟ୍ରେଟିଭ ଗ୍ରାଉଣ୍ଡରେ ତାଙ୍କ ବଦଳି କରାଯାଇଥିବା ଦର୍ଶାଯାଇଛି। ତେବେ ବିଭାଗୀୟ ଚିଠି ବଦଳରେ ଡିଆଇବିର ଭିଏଚଏଫରେ ଏହି ନିର୍ଦ୍ଦେଶ ପ୍ରଦାନ କରାଯାଇଛି।
ଗତ ଅଗଷ୍ଟ ପହିଲାରେ ରାଉତରାୟଙ୍କୁ ଜିଲା ପୋଲିସ ମୁଖ୍ୟାଳୟରୁ ବଡ଼ସାହି ଥାନା ଅଧିକାରୀ ଭାବେ ବଦଳି କରାଯାଇଥିଲା। ୩ ମାସ ମଧ୍ୟରେ ଜଣେ ଥାନା ଅଧିକାରୀଙ୍କ ହଠାତ୍ ବଦଳି କରାଯିବା ନେଇ ସ୍ଥାନୀୟ ଅଞ୍ଚଳ ସମେତ ଜିଲା ପୋଲିସ ମହଲରେ ଚର୍ଚ୍ଚାର ବିଷୟ ହୋଇଛି। ଅନ୍ୟପକ୍ଷେ ଥାନା ଅଧିକାରୀ ରାଉତରାୟ ଓ ବୈଶିଙ୍ଗା ଅଞ୍ଚଳର ଜଣେ ଯୁବକଙ୍କ ମଧ୍ୟରେ ହେଉଥିବା ମୂଲଚାଲର ଏକ ୧୪ ମିନିଟ ୧୪ ସେକେଣ୍ଡର ଭିଡିଓ ମଙ୍ଗଳବାର ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହି ଭିଡିଓ ଏସ୍ପିଙ୍କ ହସ୍ତଗତ ହେବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଆଲୋଚନା ହେଉଛି। ଭିଡିଓରେ ଯୁବକ ଜଣକ ଇନ୍ସପେକ୍ଟର ରାଉତରାୟଙ୍କ ସହିତ ଟଙ୍କା ମୂଲଚାଲ କରୁଛନ୍ତି। ଦଶହରାରେ ଥାନାର ପୂଜା ସହିତ ସମସ୍ତ ଷ୍ଟାଫଙ୍କ ପାଇଁ ନୂଆ ଡ୍ରେସ ଅଣାଯିବ। ଏଥିପାଇଁ ବହୁତ ଖର୍ଚ୍ଚ ହେବ। ଏଣୁ ଅଧିକା ଟଙ୍କା ଦେବାକୁ ଇନ୍ସପେକ୍ଟର ଦାବି କରୁଛନ୍ତି। ସେହିପରି ରାଜସ୍ବ ବିଭାଗର ଅଧିକାରୀଙ୍କ ସହିତ ମଧ୍ୟ ସଲାସୁତୁରା କରିବା ପାଇଁ ସଂପୃକ୍ତ ଯୁବକ ଇନ୍ସପେକ୍ଟର ରାଉତରାୟଙ୍କୁ କହୁଛନ୍ତି। ଘଟଣା ସମ୍ପର୍କରେ ଇନ୍ସପେକ୍ଟର ରାଉତରାୟଙ୍କୁ ପଚାରିବାରୁ କିଛିଦିନ ତଳେ ଏହି ଯୁବକ ବେଆଇନ ଭାବେ ମୋରମ ଚାଲାଣ କରୁଥିବାବେଳେ ତାଙ୍କର ୫ଟି ଗାଡ଼ିକୁ ପୋଲିସ ଅଟକ ରଖିଥିଲା। ସେ ଜାଣିଶୁଣି ଥାନାକୁ ଆସି ସମ୍ପର୍କ ସୃଷ୍ଟିକରିବା ସହ ଭିଡିଓ କରି ତାଙ୍କୁ ଫସାଇବାକୁ ଉଦ୍ୟମ କରିଛନ୍ତି ବୋଲି କହିଛନ୍ତି।
