ସୋନପୁର,୧୭।୬(ନି.ପ୍ର.): ସୁବର୍ଣ୍ଣପୁର ସହରର ଜଣେ ଯୁବତୀଙ୍କୁ ଗଣବଳାତ୍କାର ଘଟଣାରେ ପୋଲିସ ୨ ମୁଖ୍ୟ ଅଭିଯୁକ୍ତଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି । ବିଚାରପତି ଅଭିଯୁକ୍ତଙ୍କ ଜାମିନ ନାମଞ୍ଜୁର କରିବାରୁ ସେମାନଙ୍କୁ ସୋନପୁର ସବ୍ଜେଲ ହାଜତକୁ ପଠାଇ ଦିଆଯାଇଛି । ଗିରଫ ଅଭିଯୁକ୍ତ ହେଲେ ସହର ସ୍ଥିତ ଝୁପୁଡିପଡାର ସୁଶାନ୍ତ ବାଗ(୨୫) ଓ ରୁନୁ ନାଗ(୨୫)। ସହଯୋଗୀ ରଥି ବାଗ(୨୪) ଫେରାର ହୋଇଯାଇଛନ୍ତି । ତାଙ୍କୁ ଧରିବାକୁ ପୋଲିସ ତନାଘନା ଜାରି ରଖିଛି। ରବିବାର ପୀଡିତାଙ୍କ ଡାକ୍ତରୀ ପରୀକ୍ଷା କରାଯାଇଥିବା ବେଳେ ପୋଲିସ ସୋମବାର ସୁଶାନ୍ତ ଓ ରୁନୁଙ୍କ ଡାକ୍ତରୀ ପରୀକ୍ଷା କରାଇଛି। ସୋମବାର ସକାଳେ ଏସ୍ପି ଦେବୀପ୍ରସାଦ ଦାଶ, ଡିଏସପି କ୍ରାଇମ୍ ଆନ୍ଥୋନୀ ତିର୍କୀ, ସୋନପୁର ଏସଡିପିଓ ମିହିର କୁମାର ପଣ୍ଡା ଓ ଆଇଆଇସି ଲୋକେଶ କୁମାର ସାହୁ ପ୍ରମୁଖ ପୀଡିତାଙ୍କୁ ବଳାତ୍କାର କରାଯାଇଥିବା ସ୍ଥାନକୁ ଯାଇ ତଦନ୍ତ କରିଥିଲେ। ଶନିବାର ରାତି ୯ଟାରେ ଯୁବତୀ ଗଣବଳାତ୍କାରର ଶିକାର ହୋଇଥିଲେ। ସହରର ଏକ ପୋଷାକ ଦୋକାନରେ ସେଲସ୍ ମ୍ୟାନ ଭାବେ କାମ କରୁଥିବା ଉକ୍ତ ଯୁବତୀ ସାଇକେଲରେ ଘରକୁ ଫେରୁଥିବା ସମୟରେ ୩ ଅଭିଯୁକ୍ତ ତାଙ୍କୁ ଟେକି ନେଇଥିଲେ। ରୟାଲ ପଡିଆ ନିକଟସ୍ଥ ଜିମ୍ ପାର୍ଶ୍ୱରେ ତାଙ୍କୁ ସୁଶାନ୍ତ ଓ ରୁନୁ ବଳାତ୍କାର କରିଥିଲେ। ଫେରାର ଥିବା ରଥି ମୋବାଇଲରେ ବଳାତ୍କାରର ଦୃଶ୍ୟକୁ ଉତ୍ତୋଳନ କରିଥିବା ଅଭିଯୋଗ ହୋଇଥିଲା। ଥାନାରେ ଅଭିଯୋଗ କଲେ ପୀଡିତାଙ୍କୁ ଜୀବନରୁ ମାରିଦେବାକୁ ଅଭିଯୁକ୍ତମାନେ ଧମକ ଦେଇଥିଲେ। ପୀଡିତା ସୋନପୁର ଥାନାରେ ରବିବାର ଲିଖିତ ଅଭିଯୋଗ କରିଥିଲେ।
