ନୂଆଦିଲ୍ଲୀ, ୧୧।୬(ପି.ଟି.)- ଅନ୍ତର୍ଜାତୀୟ କ୍ରିକେଟ୍ରୁ ଅବସର ଘୋଷଣା କରିବା ପରେ ସୀମିତ ଓଭର କ୍ରିକେଟ୍ର ଅନ୍ୟତମ ଶ୍ରେଷ୍ଠ ମ୍ୟାଚ୍ ଓ୍ବିନର ଯୁବରାଜ ସିଂଙ୍କୁ ପ୍ରାକ୍ତନ ପାକିସ୍ତାନ ଦ୍ରୁତ ବୋଲର ସୋଏବ ଅଖତର ଅଭିନନ୍ଦନ ଜଣାଇଛନ୍ତି। ଭାରତ ପ୍ରସ୍ତୁତ କରିଥିବା ବାମହାତୀ ବ୍ୟାଟ୍ସମ୍ୟାନଙ୍କ ମଧ୍ୟରୁ ଯୁବରାଜ ସବୁଠାରୁ ଶ୍ରେଷ୍ଠ ବୋଲି ଅଖତର କହିଛନ୍ତି। ଏକ ୟୁ ଟ୍ୟୁବ୍ ଚ୍ୟାନେଲକୁ ସାକ୍ଷାତକାର ଅବସରରେ ସୋଏବ କହିଛନ୍ତି, ‘ଯୁବରାଜ ଜଣେ ରକ୍-ଷ୍ଟାର୍, ମ୍ୟାଚ୍ ଓ୍ବିନର, ମହାନ ଜୁନିୟର ଓ ମୋର ଭଲ ବନ୍ଧୁ। ତାଙ୍କ ପରି ଶ୍ରେଷ୍ଠ ବାମହାତୀ ବ୍ୟାଟ୍ସମ୍ୟାନ ଭାରତ ଆଉ ପ୍ରସ୍ତୁତ କରିପାରି ନାହିଁ। ସେ ବହୁତ ସହଜରେ ଖେଳିଥାନ୍ତି’। ‘୨୦୦୩ ବିଶ୍ୱକପ୍ରେ ପ୍ରଥମଥର ଲାଗି ଯୁବରାଜଙ୍କ ବିପକ୍ଷରେ ଖେଳିଥିଲି। ସେ ଏହି ମ୍ୟାଚ୍ରେ ବହୁତ ଭଲ ଇନିଂସ ଖେଳିଥିଲେ। ମୁଁ ତାଙ୍କ ପାଖକୁ ଯାଇ କିଛି ବାର୍ତ୍ତାଳପ କରିଥିଲି ଏବଂ ଖେଳରେ ତାଙ୍କର ଗଭୀର ଜ୍ଞାନ ବିଷୟରେ ଜାଣି ବହୁତ ପ୍ରଭାବିତ ହୋଇଥିଲି’ ବୋଲି ଅଖତର ପ୍ରକାଶ କରିଛନ୍ତି। ୨୦୧୧ ବିଶ୍ୱକପ୍ ପ୍ରଦର୍ଶନ ଲାଗି ସେ ବହୁତ ବର୍ଷ ପର୍ଯ୍ୟନ୍ତ କ୍ରୀଡ଼ାପ୍ରେମୀଙ୍କ ସ୍ମୃତିରେ ରହିବେ। ସେହିଭଳି ୨୦୦୭ ଆଇସିସି ଟି୨୦ ବିଶ୍ୱକପ୍ରେ ଷ୍ଟୁଆର୍ଟ ବ୍ରଡ୍ଙ୍କୁ ଗୋଟିଏ ଓଭରରେ ମାରିଥିବା ୬ ଛକା ଅବିଶ୍ୱସନୀୟ ଥିଲା। ଏହିଭଳି ଖେଳ ମୁଁ ଆଗରୁ କେବେ ଦେଖି ନ ଥିଲି’ ବୋଲି ଏହି ପାକିସ୍ତାନ ସ୍ପିଡ୍ ଷ୍ଟାର୍ କହିଛନ୍ତି। ଅବସର ପରେ ଭବିଷ୍ୟତ ପାଇଁ ଯୁବରାଜଙ୍କୁ ଅଖତର୍ ଅଭିନନ୍ଦନ ମଧ୍ୟ ଶେଷକୁ ଜଣାଇଛନ୍ତି।