ଭାରତ ଓ ବାଂଲାଦେଶ ସୀମାରେ ଥିବା ଡେଲଟାରେ ରହିଛି ସୁନ୍ଦରବନ ଜଙ୍ଗଲ। ଏହା ବିଶ୍ୱର ସବୁଠାରୁ ବଡ ଦଲଦଲି ଜଙ୍ଗଲ ବା ହେନ୍ତାଳ ବଣ ଭାବେ ପରିଚିତ। ୟୁନେସ୍କୋ ଏହାକୁ ବିଶ୍ୱ ଆଶ୍ଚର୍ଯ୍ୟରେ ସ୍ଥାନ ଦେଇଛି। ଏଠାରେ ଆସୁଥିବା ଜୁଆର ଭଟ୍ଟା ଓ ପଙ୍କୁଆ ସ୍ଥାନ ପ୍ରକୃତିର ଏକ ନିଆରା ସମ୍ପର୍କକୁ ସୂଚାଇଥାଏ। ଏହି ସୁନ୍ଦରବନରେ ବିଭନ୍ନ ପ୍ରକାରର ଜୀବଜନ୍ତୁଙ୍କୁ ଦେଖିବାକୁ ମିଳିଥାଏ। ଆଉ ସବୁଠାରୁ ଆକର୍ଷଣର କେନ୍ଦ୍ର ପାଲଟିଥାଏ ରୟାଲ ବେଙ୍ଗଲ ଟାଇଗର। ପ୍ରାୟ ୧୦ ହଜାର ବର୍ଗ କିଲୋମିଟର ଅଞ୍ଚଳ ପରିମିତ ଏହି ଜଙ୍ଗଲ ଅଞ୍ଚଳରେ ପାଖାପାଖି ୪୫ ଲକ୍ଷ ଲୋକ ରହିଥାଆନ୍ତି। ଏଠାରେ ଉଭୟ ବାଂଲାଦେଶ ଓ ଭାରତୀୟମାନେ ଗୋଟିଏ ଦେବୀଙ୍କୁ ପୂଜା କରିଥାଆନ୍ତି। ଜଙ୍ଗଲ ଅଞ୍ଚଳରେ ରହୁଥିବା ଏହି ଲୋକେ କୌଣସି କାମ ଆରମ୍ଭ କରିବା ପୂର୍ବରୁ ଉକ୍ତ ମନ୍ଦିରରେ ପୂଜା କରିଥାଆନ୍ତି। ମନ୍ଦିରରେ ପୂଜା ପାଆନ୍ତି ବନବିବି ନାମକ ଦେବୀ। ସ୍ଥାନୀୟ ବାସିନ୍ଦାଙ୍କ କହିବା କଥା ହେଲା ଏହି ଜଙ୍ଗଲରେ ଯେତେବେଳେ ବାଘ ମଣିଷଙ୍କୁ ଆକ୍ରମଣ କରେ ସେତେବେଳେ ସେ ହିନ୍ଦୁ ମୁସଲମାନ ଭେଦଭାବ ରଖି ନ ଥାଏ। ତେଣୁ ଆମ ମଣିଷଙ୍କ ଭିତରେ ସେମିତି କିଛି ଭେଦଭାବ ନ ଥାଏ ଓ ଆମେ ଏକାଠି ଗୋଟିଏ ଦେବୀଙ୍କୁ ପୂଜା କରିଥାଉ। ହିନ୍ଦୁ ମୁସଲମାନ ଉଭୟଙ୍କର ବିଶ୍ୱାସ ରହିଛି ସେ ଜଙ୍ଗଲରେ ସେମାନଙ୍କୁ ରକ୍ଷା କରିବାକୁ ବନବିବି ସ୍ବର୍ଗରୁ ଓହ୍ଲାଇ ଆସିଛନ୍ତି। ଏଠାକାର ବାସିନ୍ଦା କୁହନ୍ତି ବନବିବି ସୌଦି ଆରବର ଏକ ମୁସଲମାନ ପରିବାରରେ ଜନ୍ମ ନେଇଥିଲେ। ଆଉ ଉକ୍ତ ପରିବାରର ସଦସ୍ୟଙ୍କ ସହ ସେ ହଜ୍ ପାଇଁ ମକା ଯାଇଥିବା ବେଳେ ତାଙ୍କୁ ଦୈବିଶକ୍ତି ପ୍ରାପ୍ତ ହୋଇଥିଲା। ଏହାପରେ ସେ ପ୍ରାୟ ୫ହଜାର କିଲୋମିଟର ଚାଲି ଚାଲି ଆସି ସୁନ୍ଦରବନରେ ରହି ଯାଇଛନ୍ତି। ସେବେଠାରୁ ସେ ସୁନ୍ଦରବନରେ ଥିବା ଲୋକଙ୍କର ରକ୍ଷା କରୁଥିବା ବିଶ୍ୱାସ ରହିଛି। ଏମିତିକି ହିନ୍ଦୁ ଓ ମୁସଲମାନ ନାମର ମିଶ୍ରଣରେ ଦେବୀଙ୍କ ନାଁ ବନବିବି ରଖାଯାଇଛି। ଜାନୁୟାରୀ ଓ ଫେବୃୟାରୀରେ ଏଠି ମହାଆଡମ୍ବରରେ ବନବିବିଙ୍କର ପୁଜା କରାଯାଏ। ହିନ୍ଦୁ ମୁସଲମାନ ଉଭୟ ସମ୍ପ୍ରଦାୟର ମହିଳାମାନେ ବ୍ରତ ମଧ୍ୟ ରଖିଥାଆନ୍ତି।